Allen dien, die disen brief ansehent lesent oder ho^erent lesen, kúnden vnd veriehent wir Cůn||rat der Messersmit¹ vnd Cůnrat der Sateler¹, burger ze sant Gallen, das dú mure, dú v´n||ser baider húser schaidet, v´nser baider gemainlich^a) ist vnd v´nser gemaine wesen vnd be||liben sol, vnd das gezimber, das iezo vf der mure stat, das sol also stan vnd beliben an geua^erde, vnz es ain gemainú brunst dannan tribet, vnd nah der brunst so sol v´nser ietwedre buwen vffen sinen halbtail der mure an geua^erde. Wa^er o^vch das, das v´nser aintwa^edre buwen wo^elte vor der brunst, der sol buwen in sinen tail der mure swas er wil an geua^erde. Ich der vorgedaht Cůnrat der Sateler vergih o^vch offenlich, das der vorgeschriben Cůnrat der Messersmit buwen sol swas er wil an geua^erde an mine hinderen wand gen des hofes garten. Vnd das dis alles war sie vnd sta^et belibe, dar vmb so haben wir gebetten den beschaiden man Johansen den Spiser statamman ze sant Gallen², das er sin insigel hankte an disen brief, wan wir aigenú^b) insigel nút haben. Ich der vorgenente Johans der Spiser henk min aigen insigel an disen brief durh bette der vorgeschriben Cůnrates des Messersmitz vnd Cv^onrates des Satelers. Der wart geben vnd beschah ze sant Gallen, do man zalt von gottes gebúrt drúzehenhundert jar, darnah in dem ahtenden vnd zwainzigesten jar, an sant Agthen tag.

Source Fulltext: Chartularium Sangallense VI, Nr. 3339, S. 29-30.