Allen den, die disen brief ansehend lesend oder ho^erend lesen, kúnden wir der amman vnd der ra^vt ze sant Gallen, das der ersam man Eglolf der Bla^vrrer¹ fúr v´ns kam vnd^a) vor v´ns veriah fúr sich vnd fúr alle sin erben, das er alle die nútze, die von sinem wingarten halbem iemer werdend, den er het ze Bernang² in dem Rintal im Za^esenriet³, dem man sprichet der Wildrich vnd o^vch Wildrichs⁴ was, geben het an das Linsibu^el⁵ bi der vorgenemptun stat dem priester, der da^v singet, mit so^elicher gedinge, swenne ain priester da ist, der den siechen vnd o^vch iren pflegern wol fu^eget vnd o^vch wol gevallet, das der die selben nútze von dem wingarten halbem iemer me innemen sol, die wile er da^v ist, wa^er aber, das ain priester da^v wa^er, der den selben siechen oder ir pflegern niht wol ka^emi noch wol fůgti vnd gevieli, so son die vorgeschribnen nútze des vorgenempten Eglolfs erben gar vnd gantzlich ledig sin, vntz aber ain priester da^v singet, der den siechen vnd o^vch iren pfleger wol fu^eget vnd wol gevallet, der sol aber denne die nútze innemen, als vorgeschriben ist. Er enzeh sich o^vch vor v´ns aller der reht, da^v mit er sich da^v wider schirmen mo^eht an gaistlichem oder an weltlichem geriht, ob er iemer v´t geta^et wider dú vorgeschribnen ding. Der vorgenempt Eglolf Bla^vrrer veriah o^vch vor v´ns, das der nutz des andern halbtails des vorgenempten wingarten die siechen am Linsibu^el anho^eret vnd das er sú fúrdron sol zů allen den dingen, die in darzů nutzber sind, vnd das er sú niemer da^vran ierren sol mit dehainen dingen. Vnd ze ainem wa^vren vrkúnd vnd ze ainer sta^eten sicherhaid der vorgeschriben dinge henken wir der vorgenemptun statt insigel an disen brief. Ich der vorgenempt Eglolf der Bla^vrer vergih offenlich an disem brief fúr mich vnd fúr alle min erben, das alles das wa^vr ist, das hie vorgeschriben ist an disem brief. Vnd ze ainem wa^vren vrkúnd vnd ze ainer sta^etun sicherhaid der selben dinge henk ich o^vch min insigel an disen brief. Dirre brief ward geben, do man zalt von gottes gebúrt drúzehenhundert ja^vr, zwaintzig ja^vr vnd da^vrna^vch in dem ahtenden ja^vre, an dem zwelften a^vbend.

Source Fulltext: Chartularium Sangallense VI, Nr. 3337, S. 28.