Wir Hainrich von gottes verhengde apt aller conuente des gotzhuses ze Crútzlingen¹ sant Augustinus ordens gelegen by der statt ze Costentz kúnden mit rechter vergicht offennlich allen den, die disen gegenwúrtigen brieff an sehent lesen alder ho^erent lesen, dz wir mit ainbarem gemainem vnd zyttigem raut, den wir nit ainest won nun vnd dick gesůcht habint, wye wir v´nnser vnd v´nnsers gotzhuses grossen gúlte vnd wachsend schaden, der von búrgschafft wegen von cristan vnd von Juden vnd von andren redlichen sachen vff v´nns gieng, verka^ement vnd verstiessen, vnd dz wir dar v´ber funden vnd ouch funden haben, dz wir lieplich v´berainkomen sindt, dz wir ainwyllenklich vnd mit bedauchtem můtte durch der vorgenamten v´nnser vnd v´nnsers gotzhußes redlichen nott den erberen mannen Hainrich dem Risen burger ze Wyle² vnd Hainrich dem Kupfferschmid burger ze Frowenueld³ vnd ir erben habint ze kouffent geben recht vnd redlich v´nnsern hofe ze Dingenhart⁴, dem man da spricht Crútzlingers hof, vnd was dar zů ho^eret, die schůppise ze Dingenhart, der man da sprichet Crútzlingers schůppisse, vnd wz dar zů ho^eret, die an dem wingarten litt, vnd den wingarten, der ze Dingenhart gelegen ist, dem man ouch sprichet Crútzlingers wingart, vnd was zů disen selben gu^ettern ho^eret, es sye mit ackern mit wysen mit holtz mit veld mit was mit zwy mit steg mit wegen mit abwege mit zwingen mit pa^ennen mit ehaffti mit gewaltsami mit allen nútzen vnd gewonhaiten vnd mit allen rechten gesůchts vnd vngesůchts wyssendes ald vnwyssendes, als es v´nnser vordren an v´nns bra^vcht hannd vnnd als ouch wir die selben gu^etter besessen vnnd genossen habint her vntz an disen húttigen tag, diser vorgenanten gu^etter vnd was rechtes wir dar zů hannd, als vor ist beschaiden, haben wir den selben Hainrich dem Risen vnd Hainrich dem Kupferschmid vnd ir erben ze ko^vffent geben vmbe XL lib. dn. Costentzer múntz, dero wir gar vnd ganntzlich von inen gewert sygin vnd in v´nnser vnd in v´nnsers gotzhuß nottúrfften vnd schinberen nutz komen vnd bekeret sind, vnd haben v´nns dar v´ber verzigen fúr v´nns vnnd fúr alle v´nnser nachkomen vnd verzichent v´nns an disem brieffe gen dem vorgenanten Hainrich dem Risen vnd gen Hainrich dem Kupfferschmid vnd gen ir erben ze vrta^ette aller der ansprach vnd alles des rechtens, so wir an den selben gu^ettern hatten ald von dehainen dingen gehaben mochten, wir verzichent v´nns ouch alles schirms alles fúrzugs vnd aller hilff gaistliches vnd weltliches rechtes, da mit wir ald v´nnser nachkomen ald jeman andrer von vnnser wegen dis vorbenempten redlichen kouffs mo^echten widerkomen ald da mit dirre redlich vnd vngeuerlich ko^vff kúnnde ald mo^echte gewennt gebrochen ald bekrencket werden, vnd vollefůrten dz entziehen mit allen den worten wercken vnd geta^etten, so dar zů horte ald geho^eren mo^echte nach recht ald nach gewonhait des lanndes. Wir so^ellin ouch gemainlich vnd vnuerschaidlich vnd v´nnser nachkomen der vorgenanten Hainrichs des Risen vnd Hainriches des Kupfferschmidtz vnd ir erben der vorbenempten gu^eter recht wer sin nach recht one geua^erd an gaistlichem vnd an weltlichem gerichte vnd an allen stetten, da es inen nottúrfftig ist. Vnd ist dis alles beschechen vnd vollfu^ert mit gunst wyllen vnd verhenngde des hochwirdigen fúrsten vnd heren bischoff Růdolffs von Costenntz⁵ vnd ist ouch alles von v´nns vollefu^ert vnd geta^vn. Wir Růdolff von gottes gnaden bischoff ze Costentz veriehen dar nach vnd kúnnden offennlich, dz dirre kouff vnd alles, dz vorgeschriben ist, mit v´nnserm gůtten wyllen vnd gunst vnd mit v´nnser verhenngde vollfu^ert vnnd verenndet ist, vnd dar v´ber dz ze sta^etter wa^vrhait vnd ze ewiger sicherhait vnd ze wa^vren vnd offenne vrkúnde aller dirre dinge, die hie an disem brieff geschriben sta^vnnd, geben wir vorbenemter apt Hainrich vnd aller conuente des gotzhuß ze Crútzlingen Hainrich dem Risen vnd Hainrich dem Kupferschmid vnd ir erben disen brieff mit v´nnseren insigelen besigelten vnd haben ouch wir bischoff Růdolff v´nnser insigel gehenngckt an disen brieff ze ainer vrkúnd der wa^vrhait aller dirre selben dinge. Dis beschach vnd ist dirre brieff ze Costenntz geben nach der gepurt Cristi M°CCC° vnd im XXVIII ja^vre, an dem na^echsten sampstag nach inga^ennten bra^vchet.

Source Fulltext: Chartularium Sangallense VI, Nr. 3351, S. 38-40.