Allen, die disen brief sechent oder hörent läsen, künnde ich Chůnrat Wyningart pfleger deß spittals vnnd der dürfftigen ze Rapreschwyle¹ vnnd vergich offenlich an disem brieue ze deß spittals vnnd der dürfftigen wegen, als der erwürdig herre der apt deß gotshuß von Wettingen² ze syn selbes vnd synes conuentes wegen einhalb vnnd ich ze deß vorgenanten spittals wegen anderthalb einen stotz vnnd ein missehelli sament hatten vmbe die hüser, die Zürich gelegen sind vnnder Nidern Zünen³ vor den Barfůßen⁴, die fron Gůten Schererren lyptinge sinnd vnd deß Sattelhowers seligen waren, desselben stosses wir ze beiden syten kamen vff erbar lüthe hern Johanns von Schönenwerd⁵, hern Johanns Müller, hern Burckhart von Hottingen⁶ den Schultheißen Zürich rittere vnnd Hug Kriegen schidelüthe vnnd vff Johannsen Bilgerin den Grimmen ze obman inn der sache, vnnd nach allen tegdingen ansprache vnnd widerrede, so inn der sache vfgeloffen ist, so han ich mich erckennet ze deß spittals wegen, das derselbe vorgenante spittal endhein recht zů den vorgeschribnen hüsern hat, vnnd darumb so han ich mich vertzigen vnnd vertzyche mich an disem briefe ze deß vorgenanten spittals vnnd der dürfftigen wegen an die hannd deß vorgenanten aptes ze synen vnnd synes conuentes wegen aller der rechtunge vorderunge vnnd ansprache, so der spittal von Rapreschwile oder jeman ander ze synen wegen nach den vorgeschriben hüsern allen drin, beide der vorderen zweyer vnnd deß hinndern huses, mit hoffstetten vnnd mit allem dem, so dartzů gehördt, jemer dekein wyß möchte gwünnen an geistlichen vnnd an weltlichen grichten. Vnnd hierüber das diß waar, veste vnnd stete belibe, so han ich disen brief mit deß vorgeschriben spittals insigel besigelt offenlich. Diß geschach Zürich an dem donrstage vor sannt Gallenn tage, do von gottes gepurte waren dricehenhundert jar vnnd darnach inn dem achtoden vnnd zwentzigosten jare.

Source Fulltext: Chartularium Sangallense VI, Nr. 3366, S. 46.