Wir graue Kraft von Toggemburg¹, graue Friderich vnd graue Diethelm von Toggem||burg² gebrv^odere sine geuettern, kv´nden allen, die disen brief sehent, lesent oder ho^erent lesen, || dâz Heinrich vnd Chůnrat von Eppemberg³ gebrv^odere den hof ze Ramsowe⁴, den si von vns ze lehen || hant, mit allem rechte, so dar zv^o geho^ert, vnd mit vnser hant willen vnd gunst ze rechtem pfande hat^a) versetzet fron Katherinen ir swester⁵, dv´ Chůnratz von Horwe⁶ euch wirtin ist, vnd dem selben ir wirte mit ir vmbe sechs vnd zwenzig mark lo^etiges silbers Kostenzer geweges, die si der vorgenanden ir swester ze heimstúr geben hant. Vnd ist ovch disv´ satzunge geschehen mit vnser hant vnd gvnst mit allem rechte, so dar zv^o geho^ert, vnd svnderlich mit dem gedinge, swenne die vorgenanden gebrv^odere von Eppenberg oder ir erben ir swester die vorgeschribenen oder Chůnraten von Horwe ir elichen wirt oder ir erben, die den hof danne hant, ermanent vnd in gebent sechs vnd zwenzig mark silbers der vorgenanden gewicht, so ist in der vorgenande hof gentzlich ledig in lehens wise. Ovch sol dv´ vorgenande fro Katherin vnd Chůnrat ir wirt ir ietweders daz ander erben an dem vorgenanden pfantschaftze, des sv´ willeclich v´ber ein sin komen. Were ovch, daz die vorgenanden gebrv^odere von Eppemberg oder ir erben den hof ze Ramsowe wider lo^esen wolten mit den sechs vnd zwenzig marken, als vor geschriben ist, geschieht danne dv´ widerlosunge nach sant Johans tult ze sv´ngichten, so ist der cins von dem jare geuallen fron Katherinen oder ir wirte den vorgenanden ald ir erben, ob si enwere, wurde aber daz gůt vor sant Johans tult ze sv´ngichten erlo^eset, so ist in daz gůt vnd der eins alleclich ledig. Vnd hier v´ber ze einem waren vnd vesten vrkv´nde so haben wir disen brief mit vnsern insigelen v[er]sigelt offenlich. Dis geschach Zúrich an dem nechsten cinstag vor sant Matheus [tult, da von]^b) Cristes gebúrte waren drúcehen hundert jar vnd dar nach in dem nv´nden vnd [zwe]nzigosten^c) jare, da ze gegen waren her Chv^onr. vnser capplan⁷, Amor von Horwe⁸, Johs. von O^etenwile⁹, Johs. von Otikon¹⁰, Claus Rv´mer, Jacob Ho^esche vnd ander erber lúte.

Source Fulltext: Chartularium Sangallense VI, Nr. 3393, S. 67.