Consulibus, magistris civium, consilio et communi civitatis Maguntin(ensis). Claret in conspectu dei et sedis apostolice sinceritas vestre devotionis et fidei, quas ad sanctam Romanam matrem vestram ecclesiam tanquam filii benedictionis et gratie gessistis hactenus et gerere continue non cessatis. Nos itaque delectabiliter recensentes easdem et cum gratiarum actionibus uberibus multipliciter in domino commendantes, vestram providenciam attencius in domino exhortamur, quatinus in fide ac devotione huiusmodi, que vos deo ac nobis acceptiores efficiunt merito vobisque vendicant iugiter uberiorem gratiam dicte sedis, hereticorum et scismaticorum fraudulentis persuasionibus ac minis et promissionibus venenosis, quibus vos et fideles alios libenter a fide diverterent secumque in sue dampnationis devium traherent, omnino contemptis necnon penis et sentenciis spiritualibus et temporalibus utique periculosis et gravibus, quibus ipsi eorumque complices sequaces fautores adiutores et eis adherentes obnoxii et ligati existere dinoscuntur, involverent vitatis penitus, velut viri fortes constantes et strenui persistatis scituri, quod nos et ecclesia memorata vobis et fidelibus aliis adversus eosdem scismaticos et hereticos, quorum potenciam et superbiam in brevi enervabit et conteret ut speramus altissimus, assistere divina gratia suffragante intendimus auxiliis consiliis et favoribus oportunis. Dat. Auinione, X. kl. iunii, anno quartodecimo.||
. . .||
§ In eundem modum communi et universitati oppidi sancti Galli Constanciensis diocesis¹.||
. . .

Source Fulltext: Chartularium Sangallense VI, Nr. 3415, S. 82.