Wir graue Albrecht von Werdemberg¹ kúnden allen den, die disen gegenwirtigen brief sehent oder ho^erent lesen, das wir willigklich vnd gerne mit vnser diener rate vnd mit gůter vorbetrachtung sind lieplich gu^ettlich vnd frúntlich úberain komen mit vnsern o^ehemen grauen Friderich vnd graue Diethelm von Toggenburg² vmb die misshellung, so wir vnd vnser lút von Grabs³ mit in vnd ir lúten von der Wildenburg⁴ hetten oder gehebt hant vmb die swendinen in Grabser walde, die si vntzhar gehebt hant vnd vff disen tag bracht, vnd vmb den ho^vw des holtzes in dem ietzgenanten walde, mit disen gedingen vnd richtungen, so hienach geschriben sta^vnd. Es ist des ersten beredt vnd mit ta^edingen v´berain bra^vcht vnd alsus berichtet, das die ietzgenanten lúte von der Wildenburg bi den vorgenanten schwendinan beliben sont, also dz sy den vorgenanten wald nit fúrbas schwenden noch wu^esten sont, won als die schwedinan^a) ietz geschlagen vnd gemacht sint, won also vil, ist das, das inwendig in den schwendinan vnd den ziln, da yetz geschwendt ist, kain vnscha^edlich holtz sta^vt, das sont sy, ob si wend, rúten vnd scho^en machen, ob es in scha^edlich ist, vmb den wald vnd den ho^vw in dem wald so ist beredt vnd mit ta^edingen úberain bra^vcht, das die egenanten lúte von der Wildenburg sont vnbetzwungenlich howen, was holtzes si zů ir zimbre oder ze ir ta^echern bedúrffen, aber das holtz, das si zebrennende bedúrffen, das sont si ho^vwen von thúrem holtze, ligendem oder sta^endem, vnd sont nit anders ho^vwen in dem egenanten walde ze verkoffente noch anderst ze verwu^estende, wa^er aber das, das sy darúber, so hie beredt ist, icht fúrbas húwen, wa man das mit warhait vff si bringen mag, so sont sy von ie dem stock vnns dry schilling geben vnd den egenanten vnsern o^ehemen von Doggenburg o^vch dry schilling, wie dick es beschicht ald wie manig der sto^eck wirt, vnnd darumb, das alle dise vorgeschriben ding vnd ta^eding fúrganng vnd ain we^arent lieplich richtung gewunnen habe, so sont vns der egenanten vnnser o^ehem von Toggenburg lúte, die von der Wildenburg, von den dickgenanten schwendinan vnd von der rechtung des howes in dem walde, als es vor benemmet ist, ia^erlich geben sechs pfund pfening Costentzer múntz, vnd sont vns der berichten zwain zilen in dem ja^vre dryer pfund ze sant Iohanns duldt ze sunngichten vnnd dryer pfund ze sant Martis duldt alle ia^vr. Wa^er das, das sy die v´bersa^essin ze dewederm zile, so sont vnser amptlúte, ald wen wir dahin sennden, die dickgenanten lúte von der Wildenburg^b) on zorn vnser o^ehem vnd iro, ze ye dem zile, so sy das versitzent, vnnd wenne si das gewe^arent dise ietzgenanten sechs pfund, so sont si von aller menlich ledig sin vnd sint niemants fúrbas kaines zinses gebunden. Vnnd bescha^eche das, das si yemant fúrbas noti kainen weg vmm me zins, da sont wir si versta^vn vnd sont in das ablegen vnd vnschadhafft vnd vnclaghafft machen. Vnnd das dis wa^vr sige vnd sta^et belibe nun vnd harnach bi vns vnd vnsern nachkomen, so gebent wir der vorgenante graf Albrecht von Werdenberg den dickgenanten vnsern o^ehemen grauen Fridrich vnd grauen Diethelm von Toggemburg vnd iren erben vnnd den egenanten lúten von der Wildenburg von vnns vnd vnsern erben disen brief besigelt offennlich mit vnserm ingesigel ze merer sicherhait vnd ze gewissner glo^vbsame dirre vorgeschriben dingen. Dis beschach vnnd ward dir brief gegeben ze Werdenberg⁵ vff der burg, do man zalte von gottes geburt drúzehenhundert ia^vr, darnach in dem vier vnd drissigisten ia^vr, an dem na^echsten fritag nach sant Andres tag.

Source Fulltext: Chartularium Sangallense VI, Nr. 3569, S. 200-201.