Wir Chůnr. von gottes genaden apt dez gotzhuses ze dien Einsidellen¹ sant Benedicten ordens in Kostentzer bistům kúnden vnd offenen allen, die || disen brief sehend oder ho^erend lesen, daz fúr vns kam fro Anna dú Slagerin . . Eschibaches tochter von Zúrich mit ir rechten vogte Růdolfe dem Herdiner || von Zúrich vnd gab da offenlich vnd willeklich an vnser hand vˆf ein vierden teil einer jucherten reben, dú gelegen ist zwischent der Irringeren gůte, die an || vnser kilchen ze Meilan² widmen ho^erend vnd ir recht erb waren von der selben kilchen jerlich vm ein kopf kernen da von ze erbzins ze sant Martis mis der selben kilchen ze gebenne. Vnd bat vns, daz wir die selben reben lihin in allem denn^a) rechte, als sis vntz dar gúnossen vnd gehebt hatte, Heinrich Gamúlsteine von Raprechtswile³ ze der armen veldsiechen kinden hand, du gúsessen sind an der Flů vor der stat⁴ ze Raprechtswile, der phleger ist der selben kinden, ze rechtem erbú an ir stat vm den vorgúnanden zins jerlich da von ze gebenne der vor gúschribenr kilchen. Da fúriehen wir, daz wir durch bette willen fron Annen vnd der armer kinden inen han die rebi gelihen ze rechtem erbú in allem dem rechte, als si vro Anne dú Slagerin hat gehebt vnd als da vor gúschriben stat. O^vch sol man wissen, dar nach do Heinrich von Gamúlstein der vor gúnande ze der kinden hand die rebin búsas nach rechte, daz er si der ê gúseiten vron Annen an der armen kinden hand wider lech ze einem rechten libgedinge vntz an ir tot ze hanne mit vnserm gůten willen vnd gunst vnd den vor gúnanden zins da von jerlich ze gebenne. Vnd swenne si v´rstirbet, so^b) sind die rebin dien armen kinden gar vnd gantzlich lidig vnd vnansprêchig von allen ir erben vnd nakomen. Vnd daz dis stêt vnd vest búlibe, so han wir disen offennen brief búsigelt mit vnserm ingesigel ze einem waren vrkúnde der vor gúschribenr sache. Der geben ward in dem jare, do man zalte von gottús gúburt drúzehen hundert jar vnd darnach im vierden vnd drissigosten jare, an der nechsten mitwuchen nach sant Nyclaus tage, do du indictio waz dú dritte. Da zegegen waren her Hartman ab dem Turne⁵ kilchherre ze Britton⁶, her Heinrich kilchher ze Stêphey⁷, her Ortolf phrůnder ze sant Johans altar ze dien Einsidellen, Chůnr. Phentzi von Zúrich, Nyclaus der Spichward, Heinr. der Arme vnd ander erber lúte genůge.

Source Fulltext: Chartularium Sangallense VI, Nr. 3570, S. 201-202.