Wir^a) grave Johans von Habspurg¹ kv´nden allen den, die disen brief sehent oder ho^erent lesen, vnd vergehen offenlich, das wir den || hof ze Erlibach² bi Zv´rich se mit der vogtey mit gerichten mit twingen mit bennen mit lv´ten mit gv^etern vnd mit allen den rechten, so || zv^o dem selben hove geho^ert vnd als o^vch wir den hof dar haben gebracht, mit der hant gvnst vnd gv^otem willen des erwirdigen herren || von gottes genaden abt Chv^onr. des gotzhvs von Einsidellen³, von dem der vorgenande hof mit allem dem rechte, so dar zv^o geho^ert, vnser recht lehen ist, versetzet haben ze einem rechten pfande dem edeln herren vnserm lieben o^eheime graven Krafte von Toggenbvrg probste der kilchen ze der probste^b) Zv´rich⁴ vmbe hvndert mark vnd siben vnd drissig mark gv^otes Silbers Zv´richer gewichte, die er vns dar vf verliehen hat vnd vns ze nvtze komen sint. Vnd sol o^vch der vorgenande vnser o^ehein von Toggenbvrg oder sin erben, ob er enwere, den vorgeschriben hof ze Erlibach mit lv´ten mit gv^ote mit gerichten vnd mit aller der rechtvnge, so dar zv^o geho^ert, in^c) pfandes wise in siner gewer haben vnd niessen mit allen sachen alle die wile, so er von vns oder von vnsern erben vmbe das vorgenande silber nicht erlo^eset ist. Ovch loben wir mit gv^oten trúwen vnd binden vnser erben vesteklich her zv^o, des vorgeschriben hoves ze Erlibach mit der vogtey mit gerichten mit lúten mit gv^ote, so dar zv^o geho^ert vnd als o^vch wir in dar haben gebracht, fv´r ein recht pfant wer ze sinne des vorgenanden vnsers o^eheimes von Toggenbvrg vnd siner erben vmbe das vorgeseite gv^ot, so er vns ze vnsern notdúrften verliehen hat, vnd das o^vch wir noch vnser erben noch nieman anders von vnser wegen in noch sin erben an disem pfantschatze alle die wile, so er nicht erlo^eset ist, niemer bekv´mbern noch besweren svln mit worten noch mit werken mit reten noch mit getêten noch mit dekeinen andern sachen, so im oder sinen erben mo^echte schedelich wesen. Vnd hier v´ber ze einer waren vesten sicherheit der vorgeschriben dingen so haben wir disen brief mit vnserm insigel besigelt offenlich. Dis geschach Zv´rich an dem nechsten samstage vor sant Valentinvs tage in dem jare, do man von gottes gebv´rte zalte drv´cehen hvndert jar vnd dar nach in dem fv´nften vnd drissigosten jare.||
Wir Chv^onr. von gottes genaden abt des gotzhus ze den Einsidellen vergehen offenlich, das der edel herre grave Johans von Habspvrg dis vorgeschriben alles mit vnser hant gvnst vnd gv^otem willen volfv^eret vnd getan hat, vnd des ze vrkv´nde so henken wir vnser insigel an disen gegenwúrtigen brief an dem tage vnd in dem jare, so vorgeschriben ist.

Source Fulltext: Chartularium Sangallense VI, Nr. 3575, S. 204-205.