Dem erwirdigen vnserm gnedigen lieben herren . . dem abt dez gotzhuss ze sant Gallen¹ enbieten wir der Helwer², || Eberhart sin brůder der junger Helwer vndir feterre vom Herboltz³ Hainrich der Helwer vnsern gehorsamen getrv´|wen dienst willigen ze allen ziten. Vwer erwirdi tůn wir kunt, daz wir von v´ vnd von v´werm gotzhuss ze sant || Gallen ze rehtem lehen da her gehebt habint Marquarten vnd Hainrichen gebrůder wilont Hainrichs Templers von Lindo^vw⁴ seligen swester svn, die selben zwen gebrůder Marquarten vnd Hainrichen senden wir v´ vnde^a) v´werm egnanten gotzhuss ze sant Gallen frilich vnd luterlich vff mit disem brieue vnd verzihin vns gemainlich vnd sunderlich mit disem selben brieue vnd habin vns entzigen fúr vns fúr alle vnser erben vnd nachkomen gen v´ vnd gen v´werm gotzhuse ze sant Gallen vnd gen allen v´weren nachkomen an den selbenzwain gebrůdern Marquarten vnd Hainrichen aller lehenschaft aller vorderung aller ansprach alls schirms alls vszugs alls rehts gaischlichs vnd weltlichs gerihts vnd alls vnsers rehten, vnd gebin v´ vnd v´werm gotzhuss vnd allen v´weren nahkomen dezze warem vnd offenne vrkúnde vnd sta^eter ewiger sicherhait aller dirre dinge dar vber disen brief mit vnseren aigenen insigeln besigelten. Der geben ist ze Lindow, do man von Cristes gebúrt zalt driuzehenhundert jar vnd drissig jar, dar nach in dem fúnften jar, an der nehsten mitwochen vor sant Michels tag.

Source Fulltext: Chartularium Sangallense VI, Nr. 3595, S. 216.