Wir Herman von gottes gnâden abt¹ vnd der conuent gemainlich des gotzhus ze sant Gallen sant Benedicten ordens || gelegen in Costentzer bistůn^a) kúnden allen den, die disen brief ansehent alder ho^erent lesen, das wir mit gůter || betrahtung vnd mit gemainem râte v´nsers cappittels den zehenden ze Berselingen², den der veste ritter herr || Egebreht der Schulthaisse von Schafhusen³ vnd sin vordern da her von v´nserm gotzhus ze lehen gehebt hant, von im vf genomen haben, vnd haben den selben zehenden ledeklich gegeben dem spital des hailigen gaistes ze Schafhusen⁴ vnd den maistern vnd den phlegern des selben spitals, dem Schulthaissen vnd Galfraten vnd brůder V^olrichen von Balbe⁵ an des selben spitals statt, also das si v´ns vnd v´nserm gotzhus jerlich ze rehtem zins von dem selben zehenden geben sont ain halb phunt wahses Schafhuser gewiht vf sant Martis tag. Vnd het dar vmb der vorgen(ant) herr Egbreht der Schulthaisse die aigenschaft des gůtes ze Mo^erishusen⁶, das Johans der Kneht buwet, das sin reht aigen was, v´ns vnd v´nserm gotzhus ledeklich gegeben, vnd het das selb gůt von v´ns ze lehen enphangen. Vnd ze ainer merer sicherhait diser vorgeschriben ding so haben wir v´ns fúr v´ns vnd v´nser nahkomen vnd v´nser gotzhus verzigen vnd verzihen v´ns och mit disem brief aller ansprach alles rehtes vnd aller hilf gaistliches vnd weltliches gerihtes aller briefe der ba^ebste der kayser der bischof, sú sien ietzo erworben ald sú werden her nah erworben, aller gesetzten aller gewonhait vnd sunderbar alles des, da mit wir ald v´nser nahkomen dehainen weg den vorgen(anten) spital wider disen vorgeschriben dingen bekrenken mo^ehten mit geriht ald âne geriht. Vnd des ze warem vrkúnde vnd stetekait diser vorgeschriben ding so henken wir v´nserú insigel an disen brief. Der geben wart in dem vorgeschriben v´nserm gotzhus, do man zalt von gottes gebúrte drúzehenhundert vnd drissig jar, dar nah in dem núnden jar, an sant Anderes abent des zwelfbotten.

Source Fulltext: Chartularium Sangallense VI, Nr. 3723, S. 303-304.