Wir Albrecht von Castel probst¹ vnd daz . . capitel gemainlichen ze sant Stephan ze Chostentz kv´ndent vnd veriehent des offenlichen mit di||sem gegenwúrthigen brief, daz wir ainwellenclich vnd mit gůther betrachtunge durch nvtz vnd besservng v´nsers des vorgenanthen gotzhuses ze sant Stephan || v´nser gůthe, daz man nemmet zen Smitten², daz v´nsers vorgenanthen gotzhuses aigen ist, mit akker, mit wisen, mit holtz vnd mit velde vnd gemainlichen vnd || svnderlichen mit allen rechten, mit aller ehafti, mit allen nv´tzen vnd gewonhaiten, die zů dem selben gůthe ho^erent vnd geho^eren mugent, si sigent genempt oder vngenempt, gesůcht ald vngesůcht, fúr ain recht vriges vnd lediges aigen recht vnd redelichen ze kovffen geben hant vnd gebent es ze kovffen mit disem brief dem erberen vnd wolbeschaiden manne Hainrichen Lifin burger ze Chostentz vnd allen sinen erben vmb zwai vnd vierzig pfunt pfenning gůther vnd ga^eber Chostentzer mv´ns, der wir von dem selben Hainrichen Lifin mit baren pfenningen gar vnd ga^entzlichen gewert vnd bezalt sint vnd die an die burg, der man sprichet dú Núwgúttingen³, vnd an die vogtye ze Harpresswille⁴, die wir mit ir zůgeho^erden vmb Wilnhelm von Gúttingen⁵ vmb fv´nf vnd drizzig vnd hvndert pfunt pfenningen der vorgenanthen mv´ns gekovffet hant, komen vnd bekeret sint. Vnd hant disen kovffe mit dem vorgenanthen Hainrichen Lifin getân vnd vollefu^eret mit aller der gehúgde, worthen vnd werchen, die dar zů ho^erent vnd geho^eren mugent von recht oder von gewonhait des landes. Wir veriehent ouch offenlichen vnd bindent v´ns vnd all v´nser nahkomen des mit disem brief, daz wir vnd v´nser nahkomen des vorgenanthen gůtes fúr ain vriges vnd lediges aigen vnd ouch des vorgenanthen kovffes des vorgenanthen Hainr. Lifins, siner erben vnd iro nahkomen wer sont sin nah recht. Wir hant v´ns ouch gen dem selben Hainrichen Lifin verzigen vnd verzihent v´ns des mit disem brief fúr v´ns selben vnd fúr alle v´nser nahkomen gen im, gen sinen . . erben vnd gen allen iren nahkomen aller ansprach, aller vorderung, alles schirmes, aller vrihait vnd briefen, die wir ietz hant oder noch her nah von den ba^epsten oder von andren fúrsten vnd herren erwerben mo^echtint, alles rechten gaistlichen vnd weltlichen vnd svnderlichen des stůls von Ro^vme, mit dem wir oder v´nser nahkomen den vorgenanthen kovffe mo^echtint nv oder her nah widertůn vnd widerbringen. Vnd zů ainem offen vnd sta^etem vrkúnde der warhait henkent wir die vorgenanthen der . . probst vnd daz . . capitel ze sant Stephan ze Chostentz v´nser aigenú insigel an disen brief. Der geben ist ze Chostentz, do man von gottes gebúrthe zalt drúzehenhundert jar, dar nah in dem vierzigostem jar, an dem nehsten mentag nah sant Gregorien tag.

Source Fulltext: Chartularium Sangallense VI, Nr. 3739, S. 316-317.