Wir Nicol. von gottes genaden bischof ze Chostentz¹ tůnd kunt allen den, die disen brief ansehent lesent oder ho^erent lesen, das fúr v´ns || kamend ze Casteln² in der burch der vest ritter herr Eberh. von Sultzberch³ vnd vrow Vrsela⁴ sin elichú vrow ainhalp vnd Hainr. der Tettikouer der alt || vnd Hainr. der Tettikouer der iung, den man nemmet den Búndrich, anderthalp, vnd sassen wir ze gerieht, do stůnd der vorgenant von Sultzberch mit fúrsprechen dar vnd || vrkúndet vor v´ns vnd vor gericht, er wolti den hof ze Ahe⁵ vnd den zehenden ze dem dorf ze Ahe, dar uf vnd da mit sin egen(antú) vrow Vrsela ir hainstúr von irem vatter herr Albr. von Haidelberch⁶ berichtet vnd bewiset waer vnd das von v´ns vnd v´nserm gotzhus ze Chostentz^a) alles lehen ist, mit v´nserm willen vnd mit v´nser hand versetzen den vorgenanten Tettikouern vnd ir erben ze ainem rechten gewerten pfand mit allen rechten ân abschlag ze niessend vmb hundert vnd vierzeg pfunt gůter vnd gaeber Chostentzer pfenning, vnd bat im zeruarent, wie er das getaet nach recht, das es kraft hetti vnd das die selben Tettikouer vnd ir erben von der egenanten vro Vrselen vnd iren erben an dem selben pfantschatz nit bekúnbert wurden, do ward im vnzerworfelich ertailt, dz er siner vrowen Vrselen vor gericht ainen andern vogt gaebe vnd dz si denn mit dem vollefůrti, was ir ze willen waeri vmb dz vorgedacht versetzen, diz beschach vnd gab da herr Eberh. vorgenant vro Vrselen siner wirtenn nach vrtaild ze vogt iren vatter herr Albr. von Haidelberch, des si můtet vnd den si willeklich genam, der selb herr Albr. stůnd do dar mit siner tochter, der vogt er was, vnd bat sinen fúrsprechen eruaren vor gericht, wie sin tochter vorgen(antú) das vorbeschaiden versetzen mit irem egenanten wirt herr Eberh. von Sultzberch vollefu^eren solti, das es kraft hetti, do ward ertaild, dz ir vogt, der ir vor gericht geben waer, sin dristund vss fu^eren solt vnd eruaren von ir, ob si dz vorgedacht versetzen willeklich vnd vnbetwungelich tůn vnd verhengen wolti, diz beschach dristund, vnd kam herr Albr. vorgenant ir vogt ze iedem mal wider in fúr gericht vnd sait, als ertaelt was, vf sinen ait, dz si es willeklich vnd vnbetwungelich taeti, dar nach battend v´ns die vorgenanten herr Eberh. von Sultzberch, vro Vrsulla sin elich vrow mit herr Albr. von Haidelberch irem vogt, dz wir v´nsern willen vnd gunst taetend zů dem versetzen, dz vorbeschaiden ist, dz taten wir, vnd versazt da zestette herr Eberh. von Sultzberch vnd vro Vrsel sin vrow nach willen vnd rat ir vogtes herr Albr. vorgenantes den hof vnd den zehenden vorbeschaiden ze ainem gewerten pfant den vorbenanten Tettikouern burgern ze Chostentz vnd allen iren erben vmb hundert vnd vierzeg pfunt Chostentzer Pfenning, als vorbeschaiden stat, der si volleklich gewert sint, vnd beschach dz mit v´nser hant willen vnd wissen mit allen worten gebaerden vnd getaeten, als es von recht ald von gewonhait kraft hat oder haben mag. Es swůr ouch daselben vor v´ns^b) d|u egedacht vro Vrsel ainen gelerten ait ze den hailgen, dz si vnd ir erben die vorgenanten . . Tettikouer vnd ir erben an dem vorbeschaiden pfantschatz niemer ierren nach^c) bekúmbern sont mit kainem gericht gaistlichem noch weltlichem, wan als vil, wenn dú selb vrow Vrsel oder ir erben ald der vorgenant herr Eberh. von der selben vrowen Vrsellun oder ir erben wegen ermanent die vorgenanten . . Tettikouer ald ir erben mit hundert vnd vierzeg pfunden gůter vnd gaeber Chostentzer pfenning, so sont si inan den hof vnd den zehenden ze Ahe vorbeschaidenn ze lo^esen geben vnd ledig lâssen, vnd sont ouch sú lo^esen vor sant Johans tag ze súnwenden, als sitt vnd gewonlich ist, wenn si nach dem selben sant Johans tag lostin, so sol der nutz von dem pfande des jars vnd aber nit fúro geuallen sin den Tettikouern . . vorgenanten vnd ir erben. Vnd ze warem vrkúnde aller der vorgeschriben ding vnd ze staeter vestnung henken wir bischof Nicol. vorbenent v´nser aigen insigel an disen offen brief. Wir Albr. von Haidelberg vnd Eberh. von Sultzberch vorgen(ante) veriehen aller vorgeschribenen dinge, dz si recht vnd redelich vollefu^ert sint, als hie vor geschriben ist, vnd henken durch mere sicherhait ouch dar v´ber fúr v´ns vnd fúr vrow Vrsellun vorgen(antú) vnd alle v´nser vnd ir erben v´nsrú aignú insigel an disen brief. Dis beschach vnd wart dirr brief geben nach vrtaild ze Kasteln, do man zalt von gottes gebúrt drúzehenhundert jar, dar nach in dem vierzigesten jar, an dem naehsten fritag nach v´nser vrowun tag ze der liehtmes, do ze gegen waren pfaf V^olr. von Fridingen⁷, herr Walther von Hohenuels⁸ ritter, Burch. von Rogwille⁹, Hainr. der Lind burger ze Chostentz, Berchtold von Hirsdorf¹⁰, Růd. von Emtz^d)11, Hainr. der Schriber vnd ander erber lút genůg.

Source Fulltext: Chartularium Sangallense VI, Nr. 3736, S. 313-315.