Allen den, die disen brief an sehent oder ho^erent lesen, kúnde ich V^olrich von der Hohen Clingen ob Stain frie, lantrihter in Turgo^e1, vnd vergihe des offenlich mit disem brief, || daz fur mich kam an den lantag ze der Loben², da ich offenlich ze geriht sass, an dem na^ehsten ma^entag vor sant Michels der hohgeborn man min || vetter her V^olrich der junge von der Altun Clingen³ frie vnd ritter vnd braht mit im fúr geriht sin elichen^a) husfrowen fro Clarun von Lupphen⁴, vnd || offnoton mit fúrsprechen vor offem geriht, sú hettin ir gůt gelegen ze Wengen⁵, daz Hainr. Habchrain buwet mit aller zůgeho^erd, dz selbe gůt dú vorgescriben fro Clar von Lupphen ir egenempten elichen husswirt hern V^olr. von der Altun Clingen ze rehter hainstúre ze huss braht, ze koffend gegeben fúr reht aigen den ersamen gayslichen frowen in got der . . a^eptissen vnd dem conuent vnd irem closter ze Calkerron⁶ Grawes ordens in Costenzer bistum reht vnd redlich in ains rehten ko^vffs wise vmbe zehen phunt phening minr denn zwaihundert phunde phening Costenzer múnze gůter vnd gna^emer, vnd veriahen och, daz sú der selben phening allersament volleclich ane gebresten warin gewert von den egenempten . . a^epbtissenn vnd conuent vnd von ir gotzhuss ze Calkerron, nach der offenung baten sú inen ervarn an ainer vrtail mit fúrsprechen, wie sú dz vorgenempt gůt den hoff ze Wengen mit aller zůgeho^erd ane geuerd so^eltin vnd mo^ehtin geuertigon den vorgescribenan der . . a^eptissenn vnd conuent vnd ir closter ze Calkerron, also dz es craft hetti, do fragt ich vrtail vmb, do wart mit gesamenoter vrtail ertailt, dz der egescriben her V^olrich von der Altun Clingen die vorbenempten vertigung solti mit siner hant vollefu^eren vnd dz er fro Clarun siner egenempten elichen husfrowen soltin ainen vogt geben v´ber die selben sache ze vollefu^erend, dar nach gap er ir, als mit gesamnoter vrtail ertailt wart, ze rehtem vogt v´ber die selben sache ze vollefu^erend minen vettern hern V^olr. von der Hohen Clingen⁷ frien vnd ritter, darnach fragt ich aber vrtail vmbe, do wart mit gesamnoter vrtail ertailt, dz der selbe her V^olr. von der Hohen Clingen ir vogt die selben fro Clarun von Lupphen dristont uss von dem geriht solti fu^eren vnd alleweg solti fragon, ob sú sich willeclich wolti enzihen alles des rehten, so sú hatt an dem vorgenempten hoff ze Wengen mit aller zůgeho^erd gen den vorgescriben a^eptissen vnd conuent vnd ir closter ze Kalkerron, darnach fůrt der selb her V^olrich von der Hohen Clingen ob Stain die ebenempten fro Clarun dristont uss von dem geriht vnd fragot sin alleweg, ob sú sich willeclich enzihen wo^elti alles des rehtz, so sú hatt an dem vorgenanden hof ze Wengen, vnd dz sú im alleweg antwrt, dz sú es gern vnd vnbetwngenlich wolti tun, vnd kam der selbe her V^olr. och als dike fúr geriht herwider vnd sait bi sinem aide, dz er sin dristont gefragot^b) hetti, ob sú willeclich dz vorgenempte enzihen an dem hoff ze Wengen wolti tůn, vnd dz sú alleweg antwrt, sú wolti es gern tůn. Darnach gyenk dú selbe fro^c) Clar zů vor offem geriht vnd enzehe sich mit miner hend an des gerihtz statt vnd mit hern V^olriches von der Hohen Clingen ir vorgenempten vogtz hant alles des rehten^d) sú hatt an dem egenempten hoff ze Wengen mit aller siner zůgeho^erd, an der vesten ritter hern Hermans von Lyebenuels⁸, hern Albrehtz von Stainegg⁹ vnd brůder Johans des Bůchbinders hende an der vorgescribener der a^eptissen des conuentz vnd ir closters statt ze Calkerron, won sú beslossen sint vnd niht uss geturrent komen. Och enzehe sich der vorgescriben her V^olrich von der Altun Clingen ritter mit sin selbes hant alles des rehten, so er hatt an dem vorgescriben hoff ze Wengen, och an der vorgenempten hern Hermans von Lyebenuels, hern Albrehtz von Stainegg vnd brůder Joh. des Bůchbinders hende an der vorgescribener . . a^eptissen conuentz vnd ir closters statt ze Calkeron, won sú beslossen sint. Vnd ze ainer sicherhait vnd offen vrkúnd aller dirr vorgescribener ding, won es alles mit vrtail vor offem geriht vollefu^ert wart, gip ich der vorgescriben lantihter^e) disen brief mit des lantgerihtz insigel offenlich besigelt. Ich der vorgenempt her V^olrich von der Hohen Clingen frie vnd ritter vergihe ainer offener warhait aller dirr vorgescribener ding, vnd des ze ainer offen warhait gip ich o^vch min aigen insigel zů des langerihtz insigel in vogtz wise an disen brief. Ich dú vorgenant fro Clar von Lupphen vergihe ainer offener warhait vnder des vorgescriben lantgerihtz insigel vnd vnder mins vorgescriben vogtz hern V^olr. von der Hohen Clingen frien vnd ritters insigel aller der ding, dú vor an disem brief sint beschaiden vnd verscriben. Dirr brief wart geben an dem lantag ze der Loben in dem^f) jar, do man zalt von gotz gebúrt drúzehenhundert jar vnd in dem vierzigosten jar, an dem vorgescriben mantag.

Source Fulltext: Chartularium Sangallense VI, Nr. 3757, S. 337-339.