Allen^a) den, die disen brief ansehent alder ho^erent lesen, kúnden wir V^olrich von Kienberg ritter vogt ze Raprechswile¹ || vnd gemainlich der rât der selben stât, das fúr v´ns kamen der gaistlich man brůder Růdolf zem Sêw keller des || klosters ze Rúti ze des selben ir^b) klosters wegen, Arnolt Amman, V^olrich vnd Johans sinú kint vnd veriahen offenlich, das || er ze ko^vffenne hat geben recht vnd redelich, als ain ko^vf von recht geschehen sol, den gaistlichen lúten . . dem abt vnd dem conuent des vorgenanten klosters ze Rúti sin gůt ze Goltbach, das die Zimberlút bûwent, das sin lehen was von v´nserm herren grauen Johans von Habspurg vnd giltet drú malter habern, zwai hu^enr, hundert aiyer vnd ain kloben werchs, der in die aigenschaft des selben gůtes vnd das gůt selber nach bette des vorgenanten Arnoltz Ammans^c) ze rechtem aigen geben hat, als die brief bewisent, die der vorgenant v´nser herre graue Johans von Hapspurg dar v´ber geben hat², vmb nún vnd zwaintzig pfunt Zúrich múntz, der er alleklich gewert ist nach siner vergiht vnd er in sin nutz gekeret hât. Vnd ze merer bestetung vnd sicherhait des selben ko^vfs, das die vorgenant gaistlichen lút an dem selben gůt von dekainen iren nachkomen vnbekrenkt beliben, do verzehe sich der selb Arnolt Amman, V^olrich vnd Johans sinú kint vor v´ns des vorgenempten gůtes fúr sich vnd ir erben vnd alle ir nachkomen an des vorgenanten brůder Růdolfs des kellers ze Rúti hant ze ir^b) klosters wegen mit aller der rechtung vnd aigenschaft, so sú dar an hatten alder wanden han. Vnd hant sich die vorgenanten Arnolt Amman, V^olrich vnd Johans sinú kint gebunden vnd bindent sich o^vch an disem brieue, das dikgenempte gůt ze Goltbach niemer mer anze sprechenne noch ze vordrenn an die vorgenanten gaistlichen lúte noch an ir kloster, noch in kainer wise sú daran ze bekrenchenne mit gericht alder ane gericht. Vnd bâten v´ns baide tail, das wir ze warem vrkúnde vnd ze gezúgnúst aller dirr vorgeschribenn dinge den selben gaistlichen lúten . . dem abt vnd dem conuent vnd ir kloster ze Rúti geben disen brief besigelt offenlich mit v´nserr stât insigel, vnd han o^vch wir das getan nach ir bette, als hie schinber ist, do von gottes gebúrt waren drúzehenhundert jâr, darnach in dem vierzigostem jâr, an sant Marien Magdalenentag in dem ho^emanôt.

Source Fulltext: Chartularium Sangallense VI, Nr. 3753, S. 331-332.