Allen den, die disen brieff ansehent ald ho^erent lesen, kúnd ich Lútolt der schenncke von Lanndegg¹ ritter vnd vergich offenlich an disem brieff, dz ich mit mines sunes hern Bernhartz der^a) schencken von Landegg² ritters willen ra^vte vnd gůten gunst frillich^b) recht vnd redlich vnd aigenlich gib vnnd geben haut^c) an dz closter ze Maggeno^vw³ ainen halben so^vm wines geltz ja^erlich vss dem wingarten ze Anwanden⁴ gelegen by Glattburg⁵, der min recht aigen ist, vnd han dz tan mit so^ellicher gedinget vnnd bedinget, wenne miner wirtine Annen sa^eligen ja^vrzit geualle, dz man dz in dem vorbenempten closter úmerme began sol mit singen vnd mit lesen, vnd sol ain a^epptischine den selben halben so^vme wins jeklich an dem vorbenempten ja^vrzitlicher tag miner vorbenempten wirtinne dem conuent des vorbenempten closters gemainlich gen úber tische ze pfrůnd win alleklich vnd an alle mindrung, gescha^eche aber, dz ain a^epptischine des selben closters den vorbenempten halben so^vm wines ja^erlich an dem vorgeschribnen ja^vrzitlichen^d) tag miner wirtine nit alleklich ga^ebe dem vorbenempten conuent úber tische ze pfrůnde win, ald dz man dz selbe ja^vrzit nit begienge mit singen vnd mit lesen, als man^e) es danne bega^vn sol von recht, so han ich vnd min erben vollen gewalt, de^f) vorbenempten halben so^vm winß geltes dem vorgeschribnen closter ze nemen vnd in ainem andern closter ze geben war wir wellen an alle wider rede des closters ze Maggeno^vw. Vnd ze merer wa^vrhait aller vorgeschribner^g) ding, dz die wa^vr vnd sta^et syent, so henck ich min aigen insigel an disen brieff. Ich Bernhart der schencke von Landegge ritter des vorbenempten her Lútoltz des schencken sun vergihe offennlich an disem brieff ainer gantzen worhait aller vorgeschribner ding von mir an disem brieff. Vnnd ze merer sicherhait derselbun dinge so henck ich ouch min aigen insigel an disen brieff. Dis geschach vnd ward dirre brieff geben ze Glattburg vff der burg^h), do von gottes gebúrt wa^vrent druzehenhundert jâr, dar nach in dem vierzigosten jâr, an dem na^echsten dunschtagⁱ⁾ nach sant Jacobs tag des zwelffbotten.

Source Fulltext: Chartularium Sangallense VI, Nr. 3754, S. 332-333.