Wir Herman von gottes vnd des stůls gnaden ze Rome bestaetter abt des gotzhus ze sant Gallen¹ tůn kunt vnd verge||hen offenlich an disem brief fúr v´ns vnd fúr alle v´nser nahkomen allen den, die in ansehent lesen oder ho^errent lesen, wan || v´nser getrúwer li^eber Johans von Littenhaid schulthais ze Wil² sinen stadel in der nidren vorstat gelegen in der Stadelgassen³ vnd die || hofstat, da der selb stadel vffestat, gelegen entzwischan Cůnrat Mursals hofstat vnd der hofstat, dú der Trůnger was, vntz her gehebt hat ze ainem rehten zinslehen von v´nserm gotzhus vnd von v´ns von v´nser kilchen wegen ze sant Peter⁴, an der kilchen widem dú selb hofstat vnd stadel geho^errent vnd von alter her dauon nie me geben ward ze zinse wan aller ja^erlich vier hu^enr, dauon haben wir an gesehen den grôsen schaden vnd koste, die derselb Johans von Littenhaid gehebt hat mit der mure, die er hinder dem selben stadel kostlich vf getriben hat vnd gemachet^a), dar vmb haben wir mit v´nser búrger rat von Wil gemainlich vnd mit herr Frantzen lútpriesters ze Wil gunst vnd willen dem vorbenempten Johansen von Littenhaid vnd allen sinen erben vnd allenden, die den stadel vnd die hofstat iemer geko^vfent ald inne hant, die gnad getan fúr v´ns vnd fúr alle v´nser nahkomen, das sú die vorbenempten hofstat vntz an die mure, als dú mure da hinder stat, vnd o^vch den stadel son ewecliken inne han vnd son aller iaerlich vier hu^enr dauon ze zinse geben vnd nút me vnd das sú nieman an dem zinse hoher noch túro sol triben. Und ze^b) ainem waren vrkúnde vnd ze ainer staetten sicherhaid aller der gescribner dinge, das sú vest vnd vnwandelber beliben, dar vmb henken wir v´nser ingesigel an disen brief, an den o^vch der vorbenempte herr Frantz sin insigel henket. Ich herr Frantz der Ru^edelinger lútpriester ze Wil vergih o^vch offenlich an disem brief fúr mich vnd fúr alle min nahkomen ainer gantzer warhaid aller der vorgescribnen dinge vnd henk o^vch min insigel ze ainer meren sicherhaid der selben dinge an disen brief. Der geben wart ze Wil in der stat, do man zalte^c) von gottes gebúrt druzehenhundert iar, dar nah in dem vierzigosten iare, ze vsgenter pfingstwochen.

Source Fulltext: Chartularium Sangallense VI, Nr. 3745, S. 319-320.