Wir Ludowig von gotes gnaden Romischer keyser ze allen zeiten merer dez richs kúnden offenbar an disem brief allen || den, die in ansehent oder hôrent lesen, daz wir vnsern lieben dyenern vnd getrewen Heinr.walthern vnd Eberh. gebru^edern von Sultzberg vnd || Hermann vnd Joh. och gebru^edern iren vettern von Sultzberg¹ vmb ir getrew dienst, die si vns vnd dem reich getan habent vnd noh tun || su^ellen, schuldig worden sein vnd gelten su^ellen zwai hundert marck lo^etiges silbers Costentzer gewichtes. Vnd versetzen in vnd iren erben dar vmb gemainlichen vnsern vnd dez reichs kelnhof in dem dorf ze Tal² bei Rynnegk³ mit allen rehten eren nu^etzen frihaiten ehaften altengewonhaiten vnd besunderlichen mit dem kirichensatz der kirichen ze Tal, der in den selben hof gehôret, vnd mit allem dem, daz dar zvˆ gehôrt, besuht vnd vnbesuht, wie daz genant ist, also daz si den inne haben ein nemen vnd niezzen su^ellen vnd setzen vnd entsetzen, als lang biz wir oder vnser nahchomen an dem reich den vorgenanten hof mit sinen zvˆgehorden, als oben benennent ist, von den egenanten von Sultzberg vnd iren erben vmb die zwaihundert marck silbers gentzlichen erledigen vnd erlo^esen. Waer och, daz die von Sultzberg furbaz keinen brief von vns oder vnsern voruaren vmb keinerlai satzung dez hofes iendert funden, wie daz kêm, den nemen wir abe von vnserm gwalt mit disem brief, vnd wellen niht, daz er kain kraft oder furganch habe, vnd wellen och niht, daz der hof furbaz mêr stê dann die zwaihundert march. Vnd dar vmb gebieten wir allen vnsern vnd dez reichs amptluten vnd getrewen, wie di genant sein, vesticlich bei vnsern hulden, daz si di dichgenanten von Sultzberg an der Satzung dez kelnhofs ze Tal niht hindern noh irren noh niht gestatten, daz si iemand dar an irr mit keinen sachen. Vrchundes ditz briefs, den wir in dar vber geben ze einem vrchunde versigelt mit vnserm keyserlichem insigel. Geben ze Munichen an montag vor Mathie nah Kristes geburt driuzehenhundert iar, dar nah in dem aim vnd viertzigestim iar, in dem siben vnd zwainzigestim iar vnsers richs vnd in dem viertzehendem dez keysertûmes.

Source Fulltext: Chartularium Sangallense VI, Nr. 3768, S. 346.