Allen, die disen gegenwúrtigen brief ansehent alder ho^erent lesen, kv´nde ich Walther der Mayer von Altstetten¹ vnd vergih offenlich an disem || brief, das ich vmb alle krieg sto^esse vnd missehellvnge, die ich vf disen húttigen tag, als dirre brief geben ist, gehebt han mit den burgern || der stat ze Costentz², lieplich vnd gu^etlich verainet vnd verrihtet bin, mit der beschaidenhait vnd gedingen, als hie nach an disem brief geschriben || stat. Des ersten, das ich der selben burger vnd der stat ze Costentz vnd aller der burger der stett, die die burg ze Altstetten besessen hatten vnd gewunnent vnd brachent³, vnd mit namen mins herren grauen V^olrichs von Montfort⁴, hern Beringers von Landenberg⁵ ritter, Johansen des Gansers vnd aller, die von der burger wegen von Costentz hinder dem krieg warent, luter frv´nd worden bin vnd das niemer me geânden noch gea^eferen sol mit worten noch mit werken noch mit kainen sachen, das den burgern von Costentz ald den, die von ir wegen hinder dem kriege warent, in kaine wise zeschaden komen mv´g, ane alle geuerde. Ich sol och dv´ nehsten zwelf jar nachanander von dem tag, als dirre brief geben ist, wider die burger ze Costentz nit sin noch wider minen herren grauen V^olrichen von Montfort noch wider alle des riches stette, die in der buntnv´st warent des tages, do dv´ burg ze Altstetten gewunnen wart, vnd die in dirre sůn vnd rihtvnge sin went, sweli aber in diser sůn vnd rihtvnge nit sin went, gen den sol mich disv´ rihtvnge vnd dirre brief nihtes binden^a). Ez ist beredd, wa^ere das ich ald min erben vf das burgstal ze Altstetten wider bûwent wurde, so sol ich ald min erben von dem tag, so der bûwe angeuangen wirt, mit der burg ze Altstetten den burgern ze Costentz warten darnach dv´ nehsten zwainzek jare nachainander vnd si in den jaren vf vnd ab lassen, swenne si sin bedúrfent, vnd swenne si in den zwainzek jaren die burg innement, so sont si sin verkosten, mir vnscha^edelich, vnd wa^ere, das ich die burg verkoffent ald versetzent wurd ald ir suss gen ieman a^enig wolte werden, so sol ich si mit namen verkoffen ald versetzen mit dem geding, das der, der die burg koffet ald der^b), dem si gesetzet wirt, ald in swes hant si kvnt, den burgern von Costentz warte darnach als lang, vntz das sich dv´ zwainzek jare erloffent, vnd als vor ist beschaiden. Wa^ere och, das ich in dem zil, so ich den burgern von Costentz mit der burg warten sol, von dirre weite schiede, so sont min erben ald swer sich der burg vnderzúhet ald in nimet den burgern von Costentz mit der burg warten darnach als lang, vntz das sich dv´ zwainzek jar erloffent. Ez ist och gedingot, wa^ere das dero kaine, die von minen wegen hinder dem krieg warent, in dirre sv^on vnd rihtvng nit sin woltint, das sol ich ane alle geuerde den burgern von Costentz kv´nden, welt och ieman dero, die von der burger wegen von Costentz hinder dem krieg warent, in diser sůn vnd rihtvnge nit sin, das sont si mich och lassen wissen ane alle geuerde. Ich der vorgenant Walther der Mayer von Altstetten vergih offenlich an disem brief, das ich gesworn hab ainen gelerten aid ze den hailigen mit vfgehabener hant vor den ra^eten der stat ze Costentz, dis sůn vnd rihtvng sta^et zehaltende vnd alles das, daz hie vor an disem brief geschriben stat, zelaistend vnd ze vollefu^erend vnd niemer da wider zetu^ende ane alle geuerde. Vnd des ze warem vnd offeme vrkv´nde gib ich der vorgenant Walther von Altstetten min insigel an disen brief. Der ist ze Costentz geben, do man von Cristes gebúrte zalte drúzehenhvndert jare, darnach in dem ain vnd vierzigosten jar, an dem zinstag vor v´nser vrowen tag ze der liehtmisse, da zegegen warent die erwirdigen herren her Diethelm von Stainegge thůmprobst ze Costentz⁶, her Albreht von Kasteln probst ze sant Steffan ze Costentz⁷, her Hainrich von Stainegge korherre ze Costentz⁸, her Cv^onrat vome Riet⁹, her Cv^onrat der^c) schenk von Landegge¹⁰, her Cv^onrat von Haidelberg¹¹ ritter vnd ander erber lúte gnůg, die es sahent vnd hôrtent.

Source Fulltext: Chartularium Sangallense VI, Nr. 3767, S. 344-345.