Allen, die disen brief ansehent lesent oder ho^erent lesen, tůn wir kunt V^olrich von Ramswâg ritter, Anna herr Johansen des Hofmaisters ritters || êlichú wirtenne vnd Vrsulla Eglolfs von Rosenberg des eltern êlichú wirtenne, des vorbenemten herr V^olrichs tohtran, vnd veriehen offenlich an disem || brieue fur v´ns vnd fur alle v´nser erben vnd nahkomen, das wir mit gůter vorbetrahtunge vnd beschaidenhait willeklich dem êrwirdigen v´nserm gna^edi||gen herren von gottes gnaden abt Herman des gotzhus ze sante Gallen gelobt haben mit v´nsren trúwen an aines aides stat, wenne er ald sin nahkomen, wer die sint, dú pfender, dú wir von dem gotzhus ze sante Gallen haben, von v´ns ald von v´nsren erben lo^esen wen, das wir dú súlin zelo^esenne geben ân alle widerrede vnd ân allen furzug iegliches sunderlich ald allú mit anander. Vnd sint dis dú pfender, aht pfunt vnd aht schilling pfenning Kostentzer múnse geltes vnd zwên scheffol vnd sehs malter habern geltes vnd nún viertal kernen geltes Wanger messes vsser dem houe ze Wangen, dú v´nser vrsatz vnd pfant sint, vntz man v´ns von dem selben gotzhus verlihet aht march geltes an layien gúlte ald zwainzig march geltes an kylchun gúlt, vnd viertzeg malter habern geltes Lindower messes vsser dem houe ze Wangen, dú v´nser pfant sint vmb viertzeg march silbers Kostentzer gewiht, vnd drú pfunt pfenning geltes Kostentzer múnse, dú v´nser pfant sint vmb zwaintzeg march silbers Kostentzer gewiht vsser dem houe ze Gaiserwald. Wir veriehen ouch, von welem vnder v´ns ald v´nsren erben der vorgenemt vrsatz ald der pfender dehaines erledgot wirt ald erlo^eset, so son sú von v´ns allen ledig sin, das dú andern kain reht me darzů han son. Vnd ze ainem wâren vrkúnde vnd ze ainer sta^etun sicherhait der vorgeschriben dinge henken wir v´nsrú insigel an disen brief. Ich Johans der Hofmaister ritter vnd Eglolf von Rôsenberg der elter veriehen offenlich an disem brieue fur v´ns vnd fur alle v´nser erben, das die vorgenemten v´nser êlichen wirtennen die vorbenemtun glúbd getan hant mit v´nserm willen vnd gunst, vnd wa^er das die selben pfantschatz vnd vrsatz, die vor sint benemmet, an v´ns ald an v´nser erben vielin, so súlin wir ouch dasselb tůn, das hie vorgeschriben ist, vmb dú pfender ân allen furzug vnd ân widerrede, das haben wir ouch willeklich bi v´nsren trúwen an aines aides stat gelobt ze tu^enne. Vnd ze ainer merun sicherhait der selben dinge henken wir ouch v´nsrú insigel an disen brief. Der geben ward, do man zalt von gottes gebúrt drúzehenhundert jâr, viertzeg jâr, darnah in dem êrsten jâr ze inga^entem ôgsten.

Source Fulltext: Chartularium Sangallense VI, Nr. 3785, S. 358-359.