Allen den, die disen brief sechent oder ho^erent lesen, kúnd ich Arnolt der Amman vogt¹ vnd wir der rat der stat ze Rapreswille², daz fúr v´ns || kam brůder V^olrich Gogger vnd fergot daz hůs, daz er kofft hatt von V^olrich von Rûssicon³ vnd gelegen ist ze Rapreswille vf dem || berg, ein halb an her Růd. Trůchsezen⁴ rittes^a) hůs, anderhalb an des vorgenanden Rûssingers schúre, mit dem garten, so vor dem || selben hůs lit, vnd mit allen nútzen vnd rechten, so dar zů ho^ert, dem erberren geistlichen manne brůder Johans von Glarus⁵ einem Bredier an des prijors vnd des convents gemeinlich stat der Bredier von Zúrich⁶, vnd sv^onderlich die wand vnd dú selle, die da gant zewúschent dem selben hůs vnd der vorgenanden schúre, die súllent gemein sin dem hůs vnd der schúre, hie vmb so hatt der vorgenand brůder V^olrich Gogger in rechtes vnd in eines redilchen^b) koffes wiss enphangen siben phůnt phennig gůter vnd geber Zúricher múntze, der er nach siner vergicht gantzlich gewert ist, och sol er des vorgenanden hůses vnd koffes wer sin nach recht an geuerde an allen steten, do es dem prijor vnd dem conuent der Bredier von Zúrich vorgenanden notúrftig ist, vnd hatt sich och enzigen aller ansprach vnd forderůng, so er oder sin erben an daz vorgenand hůs vnd garten dehein wiss iemer haben mo^echtin vor geistlichen oder vor weltlichen gerichten, dis ist alles beschechen mit des vorgenanden vogtes hant, als vrteil vnd recht gab von v´ns vnd anderen erberren lúten, die hie vmb gefraget wrden vf den eit, vnd als in v´nser stat sitt vnd gewonheit ist. Vnd ze einem offennen v´rkund alles des, so hie vor geschriben ist, so haben wir důrch bett der vorgenanden lúten v´nser stat insigel offenlich gúhenkt an disen brief. Der geben wart, do man zalt von gottes gebúrt drúzechen hůndert jar, dar nach in dem zwei vnd vierzigosten jare, an dem cinstag vor dem palm tag.

Source Fulltext: Chartularium Sangallense VI, Nr. 3803, S. 372-373.