Ich Wernher Vnderschopf statamman ze Kostentz¹ tůn kunt allen, die disen brief ansehent oder ho^erent lesen, || daz Růdolf der Ruhe burger ze Kostentz offenlich vor mir vor gericht fúr brâcht mit dem || rechten vnd nach recht gesamnoter vrtailt mit gesworenen aiden, da Hainrich Schyny mins || herren dez bischofs von Kostentz amtman ze gagen stůnt, daz Růdolf sa^elig der Saltzman wilont burger ze Kostentz an daz gotshus ze sant Gallen hôrt, vnd besasst in och vor gericht an daz selb gotshus gen sant Gallen an mins herren des abbtes stat von sant Gallen nach recht gesamnoter vrtailt, dar nach clegt der selb Růdolf an dez selben mins herren des abbtes stat ze vro^vwen Elisabethun des vorgedachten Růdolfs des Saltzmans wilont elicher wirtennen vmb ain val von dem selben ir wirt sa^eligen vnd behůb ir och den val an vor gericht o^vch nach recht gesamnoter vrtailt. Vnd des ze ainer warhait gib ich nach vrtailt min insigel an disen brief. Der ist ze Kostentz geben, do man von Crystes gebúrt zalt drútzehenhundert jar, dar nach in dem zway vnd viertzigosten jar, an sant Agathun abent.

Source Fulltext: Chartularium Sangallense VI, Nr. 3800, S. 370.