Allen den, die disen brieff an sechint lesen oder ho^erent lesen, kúnd ich brůder Růdolff von Fridingen chomentúr vnd wir die brůder gemainlich des huses ze Tobel¹ des hailigen spitals orden von Iherusalem vnd verjehent offennlich an disem brieff, dz wir gemainlich mit gůtter betrachtunnge vnd beschaidenhait v´nnser maisterschafft vnd brůderschafft vnd mit brůder Růdolffs von Búttikon² balierers v´nnsers ordens in Tútschen lannden ra^vte hannd wyllen vnd gunst von v´nnsers vorgeschribnen huses nott wegen denen beschaidnen frowen in gotte ainer gewaltiger a^eptissinen vnd dem conuente gemainlich vnd dem closter ze Maggenowe³ recht vnnd redlich habint ze kouffen gen vnd gebint inen ouch ze kouffen mit disem brieff die zwen ho^effe gelegen ze Mo^erenschwang⁴, die man nempt der hinder hofe vnd der vorder hofe, ze rechtem aigen mit allem recht, so dar zů vnd dar in ho^eret von recht ald von gewonhtz^a), es syge gesůchtes ald vngesůchtes, die ho^efe baid vor v´nnser recht aigen wa^vrent, ledeklich vmb LXXXXII lib. d. gena^emer Costentzer múntz, der wir gar vnnd ganntzlich gewert sind vnd in v´nnsern vnd in v´nnsers vorgeschribnen huses schinbaren nutz komen sind vnd bewenndet, vnnd wa^ere, dz wir vss den vorgeschribnen zway ho^efen v´t versetzet ald verkúmbret hettint, dz von recht dar in ho^eren so^elte, ald dz jeman dehain gelte vnntzher vss den selben ho^effen genomen ald gehept hetti von recht ald von gewonhait, so sond wir den vorgenanten frowen vnd dem closter ze Maggenowe die vorgeschribnen zwen ho^effe enntryhen vnd ganntzlich ledig machen von aller mengklichem vnd der ho^efen wer sin nach recht vnd v´nnser nachkomen, wa^v sin ain a^eptissin der conuente ald dz closter ze Maggenowe bedurffent vnd nottúrftig sind, vff gaistlichen vnd weltlichen gericht, vnd enntzichent v´nns mit disem vnd an disem brieff aller der recht vnd ansprach, so wir ald v´nnser nachkomen je gewunnent hattint ald jemer gewúnnen mo^echtint von recht von gewalt ald von gewonhait an den vorbenempten zway ho^efen vnd wz dar zů vnd dar in ho^eret. Vnd ze merer sicherhait aller vorgeschribner dinge so henngcken wir brůder Růdolff von Fridingen comentúr vnd der conuente gemainlich des vorbenempten huß ze Tobel v´nnsere insigel an disen brieff, an den ouch ich brůder Růdolff von Bútikon balierer des vorgeschriben ordens in Túschem lande min aigen insigel hencke ze ainem wa^vren vrkúnde vnnd o^vch ze merer sicherhait, dz alle vorgeschriben ding an disem brieff mit miner hand willen ra^vtte vnd gůttem gunst geschechen sind rech^a) vnd redlich. Diß geschach vnd ward dirre brieff geben ze Wyl⁵ in der statt, nach der gepurt Cristi M°CCC° XXXXII jare, an der na^echsten mitwuchen vor sant Jo^ergen tag.

Source Fulltext: Chartularium Sangallense VI, Nr. 3805, S. 374-375.