Allen, die disen brief sehent oder ho^erent lesen, kv´nden wir grave Johs., grave Rv^od. vnd grave Go^etfrit von Habspvrg gebrv^odere, graven Johs. seligen sv´ne von Hapspvrg, vnd vergehen offenlich fv´r vns vnd fv´r alle vnser erben vnd^a) nachkomen, die wir vesteklich her zv^o binden, als wir vns mit der bvrg vnd mit der stat ze Rapreswile vnd mit andern vnsern landen vnd lv´ten gen . . dem bvrgermeister . . dem rate vnd . . den bvrgern der stat ze Zv´rich verstricket vnd verbvnden haben ze einer ewigen bvntnv´sse, als die brieve¹ wol bewisent, die dar v´ber geben vnd versigelt sint, daz wir da dvrch vnser êren willen vnd dvrch daz wir vnser herschaft vnd alle vnser erben vnd nachkomen bi gewalt, bi êren vnd bi gv^ote iemer mere dester fv´rderlicher beliben mvgen, so haben wir gelopt verheissen vnd verschriben in der selben bvntnv´sse, daz wir noch enkeiner vnser êrben noch nachkomen die stat noch die bvrg ze Rapreswile noch enkein rechtvng, so inrent den ringmvren dar zv^o geho^ert, niemer versetzen noch verko^vffen noch enkein weg angriffen noch verkv´mberren svln ane des . . bvrgermeisters . . der ra^eten vnd . . der bvrger Zv´rich vrlop, gvnst vnd gv^otem willen, vnd daz dv´ selbe bvrg vnd stat mit lv´ten vnd mit gv^ote vnd mit allen den rechten, so dar zv^o geho^ert vnd vorgeseit ist, in vnser vnd in allen vnser erben vnd nachkomen hant vnd gewalt iemer mere beliben sol. Were aber, daz wir oder vnser êrben ald dekeiner vnser nachkomen da wider tv^on oder teten vnd vnser êren vergessen wolten, da vor gottes kraft si, so erlo^vben wir fv´r vns vnd fv´r alle vnser erben vnd nachkomen dem . . rate vnd . . den bvrgern gemeinlich ze Rapreswile, daz si sich da bi dem eide, so si dar vmb gesworn hant, des wir nicht enbern wolten, wan o^vch wir sin gesworn haben, werren, daz weder bvrg noch stat von vnser^b) herschaft noch von vnsern erben vnd nachkomen niemer verendert verko^vft noch versetzet werden, vnd daz si daz mit gewalte vnd mit aller ir mvgent vnd kraft wenden vnd nicht vertragen, als verre ir lip vnd gv^ot erlangen mag. Vnd dar zv^o so svln den selben bvrgern vnd . . der stat ze Rapreswile die erbern . . lv´te . . der bvrgermeister . . der rat vnd . . die bvrger der sta^c) ze Zv´rich vnd die andern vnser lant vnd lv´te vnd alle die, so ze dirre bvntnv´sse geho^erent, geraten vnd behvlfen sin vf den eit, dc daz gewendet vnd nicht volbracht noch volfv^eret werde, als o^vch in dem brieve der bvntnv´sse, so wir mit Zv´richern gelopt vnd gesworn habent, offenlich geschriben stat. Vnd hier v´ber ze einem offenn vrkv´nde vnd einer ewigen steten sicherheit so han wir dirre brieven zwene g[eliche]^d) geschriben mit vnsern insigeln offenlich besigelt crastino Michah. Actum anno XLIII°.

Source Fulltext: Chartularium Sangallense VI, Nr. 3850, S. 408-409.