Allen, die disen brief sehent oder ho^erent lesen, kv´nden wir . . der vogt . . der rat vnd die bvrgere gemeinlich der stat ze Rapreswile vnd veriehen offenlich, als die edeln vnser genedigen herren grave Johs., grave Rv^od. vnd grave Go^etfrid von Habspvrg gebrv^odere, vnsers herren seligen graven Johs, von Hapspvrg¹ sv´ne, ein bvntnv´sse vnd ein ewig geselleschaft mit . . dem bvrgermeister . . den reten vnd den bvrgern ze Zv´rich gemeinlich dv´rch vnser vnd dv´rch ander ir landen vnd lv´ten nvtz vnd eren willen gemachet vnd gesworn hant, daz o^vch wir die selben bvntnv´sse nach vnser herren gebotte vnd heissenne haben gelobt vnd gesworn stête ze haltenne mit allen den worten vnd mit allen den stvcken, so an dem versigelten brieve der bvntnv´sse² geschriben stant. Vnd wanne wir von einem bvrgermeister vnd dem rate ze Zv´rich, welhe iemer bvrgermeister oder rete ze Zv´rich werdent, ermant werden vmb helfe, vmb angriffen oder vmb dekeiner hande sache, so si sich erkennet hant, ob dv´ manvnge beschicht hin gen vnserm rate oder ze der kilchen an der kantzeln, ob ze dekeinen ziten ze Rapreswile rates nicht were, daz wir danne . . dem bvrgermeister . . dem rate vnd den bvrgern ze Zv´rich gemeinlich geraten vnd beholfen svln sin mit gantzen triwen ane allen fv´rzvg vnd ane alle widerrede nach den versigelten brieven, so beidenthalb v´ber die bvntnv´sse geben sint. O^vch veriehen wir svnderlich, als die vorgenanden vnser herren fv´r sich vnd fv´r alle ir erben vnd nachkomen globt vnd verbrievet hant, daz si die bvrg noch die stat ze Rapreswile noch enkein rechtvnge noch gv^ot, so inrent den ringmvren dar zv^o geho^ert, niemer versetzen noch verko^vffen noch mit enkeinen sachen angriffen noch verkv´mbern svln ane . . des bvrgermeisters . . des rates vnd der bvrger ze Zv´rich gvnst vrlob vnd willen, dvrch daz dv´ selbe stat vnd bvrg mit lv´ten vnd^a) mit gv^ote vnd mit allen den rechten, so dar zv^o geho^ert, als vor geseit ist^b), in ir handen vnd in ir herschaft vnd in ir erben vnd nachkomen gewalt beliben. Vnd wa die selben vnser herren, ir erben ald ir nachkomen daz v´bersehen wolten, so haben wir von ir heissenn globt vnd gesworn, des o^vch si nicht enbern wolten, vnd loben o^vch mit disem gegenwúrtigen brieve bi vnsern eiden, die wir liplich dar vmbe getan haben, fv´r vns vnd fv´r alle vnser nachkomen, die wir her zv^o binden, daz wir daz mit allem ernste vnd mit aller der^c) macht vnd kraft, so wir erzv´gen mvgen, werren vnd wenden vnd nicht vertragen noch gestatten svln, als verre vns lip vnd gv^ot erlangen mag. Vnd wo wir dar zv^o ze krank an vnser mvgent weren, so haben wir nach dem vrlob vnd heissenne der vorgenanden vnser herren mvgent vnd gewalt, . . den bvrgermeister . . den rat vnd die bvrgere ze Zv´rich vnd die andern lant vnd lv´te, so ze diser bvntnv´sse geho^erent, ze manenne vmb helfe, vnd sv´ln vns o^vch die danne nach den brieven der^d) bv´ntnv´sse geraten vnd beholfen sin vf den eit, das daz gewendet vnd gantzlich ab geleit werde. Dis vorgeschriben alles vnd dar zv^o die stvcke, so an dem versigelten brieve der bvntnv´sse geschriben stant, haben wir gesworn fv´r vns vnd fv´r alle vnser nachkomen, die wir her zv^o binden, veste vnd stete ze haltenne vnd da wider niemer ze tv^onne mit enkeinen sachen. Vnd ze einem ewigen vesten vnd steten vrkv´nde aller der dingen, so vor an disem brieve verschriben sint, so haben wir vnser stat insigel ze Rapreswile an diser brieven zwene geliche geschriben offenlich gehenket. Die geben wurden ze Raprechtswile morndes nach sant Michels tag^e), do von gottes gebv´rte waren drv´zehenhvndert vnd viertzig jar vnd dar nach in dem dritten jare. Wir grave Johs., grave Rv^od. vnd grave Go^etfrit von Hapspvrg gebrv^odere veriehen offenlich an disen brieven, daz . . der vogt . . der rat vnd vnser bvrgere ze Rapreswile gemeinlich die vorgesehen bvntnv´sse vnd die andern sachen, so vor mit worten bescheiden vnd erlv´chtet sint, gelobt vnd gesworn hant fv´r sich vnd fv´r ir nachkomen, ze einem ewigen vrkv´nde verbrievet vnd versigelt hant, daz wir sie heissen tv^on, vnd nicht embern wolten, wan wir daz selbe o^vch gesworn haben. Vnd dar vmbe ze einem offennen vrkv´nde so haben wir vnser insigel zv^o vnser bvrger von Rapreswile insigel offenlich an diser brieven zwene geliche geschriben gehenket, in dem jare vnd an dem tage, so vorgeschriben ist.

Source Fulltext: Chartularium Sangallense VI, Nr. 3849, S. 406-408.