Allen, die disen brief ansehent, lesent oder ho^erent lesen, tůn ich Amor von Luterberg ritter, || Jacob¹ sin sun, Johans dem man sprichet Pfulwe von Lûterberg, Wilhelm, Růdolf vnd Hug von Luterberg || gebrůder kunt vnd veriehen offenlich an disem brieue fúr v´ns vnd fúr alle v´nser erben vnd nahkomen, die wir || darzů binden mit disem brieue, das wir willeklich gesworn haben v´nser iegliche besunder ainen gelerten aid ze den hailgen mit vfgehabenr^a) hant v´nserm gna^edigen herren von gottes gnaden abt Herman des gotzhus ze sante Gallen, das wir die burg ze Luterberg niemer súlin gebuwen wan mit sinem vnd siner nahkomen willen vnd gûnste, wir vertro^esten vnd versicherren sú danne vor, das inen vnd dem gotzhus ze sante Gallen kain schad ab der selbun burg niemer geschehe mit kainen sachen. Wir haben ouch ze ainer mêrun sicherhait der selben dinge zů v´ns ze tro^estern geben v´nser gna^edigen herren grauen Albrehten von Werdenberg den eltern, grauen Fridrichen von Tokkenburg, grauen Albrehten den jungern von Werdenberg². Vnd ze ainem wâren vrkúnde vnd ze ainer sta^etun sicherhait der vorgeschriben dinge henken wir v´nsrú insigel an disen brief. Wir die vorgenemten graue Albreht der elter von Werdenberg, graue Fridrich von Tokkenburg vnd graue Albreht der junger von Werdenberg veriehen offenlich an disem brieue, das wir dur der vorgenemten von Luterberg ernstlicher bette willen willeklichen gesworn haben v´nser ieglichen besunder ainen gelêrten aid ze den hailgen mit vfgehabenr hant, wa^er das die vorbenemten von Luterberg ald ieman andre die burg ze Lûterberg woltin buwen vnd v´nserm vorgenanten herren abt Herman vnd sinen nahkomen nút trostunge vnd sicherhait geben woltin, als hie vor geschriben stât an disem brieue, so súlen wir ân alle geua^erde v´nserm vorbenemten herren abt Herman vnd sinen nahkomen vnd dem gotzhus ze sante Gallen beholfen sîn mit libe vnd mit gůte, als vêrre wir kunnen vnd mugen, das da nút gebuwen werde. Vnd ze ainer mêrun sicherhait der selben dinge henken wir ouch v´nsrú insigel an disen brief. Der geben ward ze sante Gallen in der stat, do man zalte von gottes geburt drúzehenhundert jâr, viertzeg jâr, dar nah in dem vierden jâre, an sant Fîdun tage.

Source Fulltext: Chartularium Sangallense VI, Nr. 3902, S. 450-451.