Allen den, die disen brief sehent oder ho^erent lesen, kúnde ich her Růdolf Trugsetzo¹ ritter gemein man vmb dis nachge||schriben sache vnd wir Johans von Hasel, Andres Snepfo, Heinr. Gamlenstein vnd Cůnr. Phawo burger ze Rapreswile² || schidlúte vmb die selben sache vnd veriechen offenlich an disem brief, als die geistlichen herren der abt vnd der || conuent gemeinlich des gotzhus ze Rúti³ des ordens von Premonstrey einhalb, anderhalb ein teil der burger ze Rapreswile vnd die lút ze Kempraten⁴ vmb die sto^esse, so sú ietz lang mit einandern gehebt hant vmb das gemein march holtzes vnd des tôten moses, als hie nach verschriben ist, beide teil v´ns dar vmb willeklichen erkusen, die selben sto^esse ze berichtenne, vnd won der lo^vf dirre weite zer gat vnd in der zit der jaren vil ding verendert wirt, da von so geben wir ein erkantnust mit geschrift durch beider teil bette willen ein ewig vnd ein stête richtung vmb die selben sto^esse mit solicher ordenung vnd bescheidenheit, daz holtz vnd daz tot mos, so von der vorgenanten herren von Rúti gůt von der Kemerlen⁵ gen dem Roten weg⁶ hin gat vf dem stein bi dem túrlin vntz in daz riet vf den stein vnd von dem stein vntz in den Lochbrunnen⁷ vnd von dem Lochbrunnen hin vntz in den Húlenstein⁸, wie der runs des brunnen hin flússet, er fliesse slecht oder krumbe, daz da die selben herren von Rúti vnd alle ir nachkomen stêteklich iemer me an irsal haben súllent daz holtz vnd daz tôt mos, daz inrent dem vorgenanten zil gelegen ist, hin gen ir closter mit gůtem willen vnd gunst der burgere von Rapreswile, der von Kempraten vnd von allen dien, die kein ansprach ze teil oder ze gemein dar an haben mochten, won sú sich des luterlich durch got vnd durch v´nser fro^vwen ere vnd durch ir vorderen vnd ir selen heile vnd ze trost willeklichen entzigen hant in des abtes vnd der herren vnd allen iren nachkomen des vorgenanten gotzhus hant vnd in ir gewalt, niemer mer kein ansprach noch vorderung dar an ze habenne mit worten mit werchen mit rêten mit getêten mit geistlichen noch mit weltlichen gerichten noch an gericht, vnd also súllent die vorgenanten herren der abt vnd der conuent gemeinlich des gotzhus ze Rúti vnd alle ir nachkomen daz vorgenant holtz vnd mos eweklich růweklich besitzen niessen vnd haben, als es inen wol kunt vnd fu^eget, fúr ir recht ledig eigen gůt, vnd sint o^vch also die vorgenanten sto^esse mit beider teillen willen vnd wússent lieplich vnd minneklich berichtet vnd o^vch von v´ns fúnfen vs gesprochen. Vnd des ze offennen waren stêten vnd vesten vrkúnd so han ich her Růdolf Trugsetzo ritter gemein man vmb dis vorgeschriben sache disen brief offenlich besigelt mit minem insigel, vnder das selbe insigel wir Johans von Hasel, Andres Snepfo, Heinr. Gamlenstein vnd Cůnr. Phawo schidlút vmb die selben sache von beiden teillen dar vmb erkosen v´ns willeklichen binden ze^a) vrkúnd vnd ze offenner vrzúgnust des vorgenanten vsspruches vnd alles des, so hie vor geschriben ist, won wir eigenner insigel nút haben. Ich Heinr. ab dem Wasen vogt vnd wir der . . rat der stat ze Rapreswile veriechen offenlich an disem brief, das wir geho^ert vnd gesechen haben dis vorgeschriben sto^esse berichtet lieplich vnd vs geseit mit aller der bescheidenheit vnd ordenung, als hie vor geschriben ist, vnd des ze vrkúnd vnd ze offenner vrzúgnúst nů vnd hienach iemer mere so hab ich Heinr. ab dem Wasen vogt min insigel vnd wir der . . rat der stat ze Rapreswile v´nser stat insigel offenlich gehenket an disen brief durch ernstlicher bette willen der vorgenanten lúten beider teilen. Dis geschach vnd wart dirre brief geben, do von gotes gebúrte waren drúzechen hundert jar, viertzig jar vnd dar nach in dem fúnften jare, an dem nechsten donrstag nach sant Vrbans tag.

Source Fulltext: Chartularium Sangallense VI, Nr. 3924, S. 472-473.