Allen den, die disen brief sechent oder ho^erent lesen, kv´nde ich graf Johans von Habspůrg¹ vnd vergich offenlich an || disem brief fúr mich min geswistergit vnd v´nser erben, daz ich mit bedachtem můt vnd důrch min gůten nůtz || dien erberren lúten Berchtold von Wittikon², den man nemet Kal, vnd frow Eisbeten siner elichen wirtinnen || innen beiden vnuerscheidenlich vnd ir erben, ob sú enwerin, zwentzig mút kernen geltes Rapreswiler mess gůtes vnd gebes vf der múli, die da lit ze Rapreswile³ in der stat, vf allen nútzen vnd rechten, so dar zů ho^ert, die man innen jerlichen vf sant Martis tag von dien ersten nútzen vnd cinsen an allen fúrzůg vnd widerrede geben sol, ze kofenne geben hab vmb sechs vnd vierzig march silbers gůtes vnd gebes Zúricher gewichtes, dero sú achtzechen march des vorgenanten silbers werten her Růd. Trůchsetzen⁴ ritter vnd von im losten achtzechen mút kernen geltes ab der vorgenanten múli, a^echt vnd zwentzig march silbers sú mir gaben, der ich gantzlich von inen gewert bin vnd in minen vnd miner geswistergiten gůten nůtz bekeret han, aber sú hant mir die liebi getan, daz ich vnd min erben vmb sú oder ir erben, ob sú enwerin, die vorgenanten zwentzig mút kernen wol widerkofen můgen mit dien vorgenanten sechs vnd viertzig marchen silbers gantzlich, also ob wir wider koftin vor sant Johans tag ze sv´ngichten, so sint v´ns die zwentzig mút kernen gantzlich ledig vnd los, koftin aber wir die zwenzig mút kernen wider mit dien vorgenanten sechs vnd viertzig marchen silbers nach sant Johans tag ze sv´ngichten, so ist innen der vorgenant cins des jares gevallen, vnd nút fúrbaser. Ich han och gelobt fúr mich minn geswistergit vnd v´nser erben, des vorgenanten cinses wer ze sinne an allen steten an geuerde, do es innen oder ir erben noturftig sin mag, vnd hie wider niemer ze tu^enne mit worten werchen geistlichen noch weltlichen gerichten noch an gericht. Vnd des ze offennem waren steten vnd vesten v´rkúnd so han ich graf Johans von Habspůrg vorgenant disen brief offenlich besigelt mit minem insigel fúr mich min geswistergit vnd v´nser erben. Der geben wart, do man zalt von gotes gebúrt drúzechen hvndert vnd vierzig jar, dar nach in dem sechsten jare, an dem nechsten dornstag vor sant Thomas tag.

Source Fulltext: Chartularium Sangallense VI, Nr. 4003, S. 529-530.