Wir Walther der Blarer amman¹ vnd der ra^vt gemeinlich ze sant Gallen kúndent vnd verjechend offenlich an disem brieff allen, die in sechent lesend oder ho^errend lesen, das fúr v´ns kam Herman der Seiler v´nser burger vnd veriach offenlich vor v´ns, das er v´nserm spital ze sant Gallen recht vnd redlichen ze kouffen geben hett den garten, der hinder sinem hus in der vorstat gelegen ist vnd an des vorgeschriben spitals aker stosset, vmb drú pfund pfenning gůter vnd geber Costentzer múntz, der er gentzlich von im vssgericht vnd ouch bezalt wer, vnd veriach ouch, das er dem vorgeschriben spital den vorgenanten garten in dem rechten ze kouffen geben hett, das nicht da von gan solte, vnd was zinses von sinem hus vnd dem selben garten vnd ouch von dem andren garten giengi gen sant Mangen² ze richten vnd ze geben, das er vnd sin erben vnd sin nachkomen vnd in wes hand das vorgeschriben hus vnd der ander gart kunt, es sig von kouffes oder von ander sach wegen, den selben zins von dem selben hus vnd dem andren garten geben vnd richten solt, vnd dz der gart, den er dem spital ze kouffen geben hett, nicht zinshafft solte sin gen sant Mangen. Vnd wer, das er vnd in wes hand das vorgeschriben hus vnd der ander gart kunt den zins nit gantzlich gebind noch richtind besunderlich von dem selben hus vnd garten, als vorgeschriben statt, vnd der vorgeschriben spital angesprochen vnd bekrenkt wurde von des garten wegen, so er vmb inn gekoufft hett, so solte dem selben spital vnd sinen pflegern hus vnd hoffstatt vnd die garten, so darzů geho^erend, gantzlich gefallen sin mit allen rechten, vnd solt er noch kein siner nachkomen kein recht fúrbas niemer han noch gewinnen mit gericht noch a^vn gericht zů dem vorgeschriben hus vnd garten, vnd verjach, das er disen kouff volfu^ert hett mit den vorgeschriben dingen vnd gedingen recht vnd redlich mit worten vnd mit werken, so darzů gehorten vnd notdurfftig waren von recht oder von gewonheit vnd als es krafft hett vnd haben solt nu vnd ouch hie nach. Vnd des ze vrkúnd vnd gantzer warheit so haben wir v´nser statt insigel gehenkt an disen brieff, vnd^a) das ich der vorgenant Herman mich binde ze merer sicherheit der vorgeschriben ding vnd geding. Der geben ist an dem ne^achsten fritag nach sant Thomas tag des heilgen zwelffbotten in dem jar, do man zalt von gotz gebúrt drútzechenhundert vnd sechs vnd vierzig jar.

Source Fulltext: Chartularium Sangallense VI, Nr. 4004, S. 530-531.