Allen den, die disen brief sechend oder ho^erend lesen, kúnde ich graf Johans von Habspurg¹ || vnd vergich offenlich an disem brief fúr mich vnd minú geswistergit v´nser erben vnd nach||komen, als dú batstub ze Rapprechtswile², die gelegen ist nebend dem vssern tor der stat ze Rap||prechtswile, von minen vordern gefriget wart, so sol man wissen, das ich mit bedachtem můt vnd gůtem rat vnd ernstlicher bette willen minem lieben Otten von Rambach vnd fro^vwen Elsbeten siner elichen wirtinen Heinr. Bilgris tochter die genad vnd die friheit o^vch der badstuben getan hab, das dú selb badstub nu vnd hie nach iemer mêr in aller der friheit vnd gůten gewonheiten beliben sol an ir sal an wider red von menlichem in aller der wise, als si da her gewesen ist, vnd súnderlich, das ze Rapprechtswile in der stat noch da vor nu noch hie nach eweklich nieman kein badstuben noch bat machen noch han sol, da von dú vorgen(ant) fro^vw Elsbet von Rambach vnd ir erben vnd nachkomen bekrenket oder gesumet mo^echten werden an iro badstuben. Es sol o^vch nu vnd hie nach iemer me nieman kein offen bad han den burgern, der die lút vmb lon bade, den Otto von Rambach vnd fro^vw Elsbet dú obgen(ant) sin elichú wirtin vnd ir nachkomen. O^vch sol man wissen, wer die badstub ze Rapprechtswile inne habend wirt, es si nu oder hie nach, der sol si in gůten êren han vnd gewonheiten gen menlichem, er sige rich oder arm, als sitte vnd gewonlich ist in andern gůten badstuben, an alle geuerde. Vnd won dis alles beschechen ist mit aller der sicherheit vnd ehafti worten vnd werchen, so dar zů notdúrftig sin mocht, das es billich kraft vnd macht haben sol vnd hie wider nieman nu noch hie nach iemer mer reden tůn noch kein sache erdenken kan noch mag, da von dú vorgenante friheit bekrenket oder beswechert mo^echt werden lútzzel oder vil, so hab ich der obgenante graf Johans von Habspurg ze offennem waren steten vnd vesten ewigen vrkúnd disen brief off[enlich besigelt mit]^a) minem eigen insigel. Der geben wart ze Rapprechtswile in der stat ze vsgehende[m . . ., do]^a) man zalt von gottes gebúrt drúzehen hundert jar vnd vierzig jar, dar nach in dem sibenden jare.

Source Fulltext: Chartularium Sangallense VI, Nr. 4062, S. 574-575.