Allen den, die disen brief sehent lesent oder ho^erent lesen, kúnde ich Růdolf der Maier genemt von Alstetten¹ vnd vergich offenlich an disem brief || fúr mich vnd fúr alle min erben vnd nachkomen, das ich kam fúr den erwirdigen minen gena^edigen herren von gottes gnaden abt Herman || abt des gotzhus ze sant Gallen² vnd gab in des hant ûf frilich vnd willeklich vnd mit bedahtem můt Adelhaiten die Stricherinun vnd || Elsbethun vnd Vrsullun irú kint, die min lehen warent von dem gotzhus ze sant Gallen, gantzlich vnd gar mit allen rehten, also das sú von mir vnd von allen minen erben vnd nachkomen gantzlich ledig sin sont vnd an das vorgenemt gotzhus ze sant Gallen geho^eren sont, vnd han darumb von der vorgenemten Adelhaiten emphangen vnd genomen sehsthalb phunt phenning gůter vnd ga^eber Costentzer múnse vnd etweuil ligentz gůt, das sie von ir vatter sa^eligen von erbe angeuallen was. Ich han och gelopt mit gůten trúwen, das ich vnd min erben des vorgenemten mines gena^edigen herren abt Hermans vnd siner nachkomen an des vorgenemten gotzhus stat reht wern sullent sin nach reht vmb dú vorgeschriben Adelhaiten vnd irú kint gen menlichem an gaistlichem vnd an weltlichem gericht. Ich han mich och enzigen vnd enzihe mich mit disem brief fúr mich vnd fúr alle min erben vnd nachkomen gantzlich vnd gar aller der reht vnd ansprach, so ich hatte ald haben solt ald moht zů der vorgenemten Adelhaiten der Stricherinun vnd ir kinden von aigenschaft ald von lehens wegen ald von dehainen sachen, vnd ist dis beschehen vnd vollefu^ert mit worten vnd mit werken, als es kraft hatte vnd haben sol von reht vnd von gewonhait. Vnd han darumbe ze ainer sta^eten sicherhait vnd gantzer warhait aller der vorgeschriben dinge min insigel gehenkt an disen brief fúr mich vnd fúr alle min erben vnd nachkomen. Dirre brief wart geben ze sant Gallen in der stat, an dem na^ehsten mêntag nach sant Matheus tag des zwelfbotten in dem jar, do man zalt von gottes gebúrt drúzehen hundert jar, vierzig jar vnd darnach in dem sibenden jar.

Source Fulltext: Chartularium Sangallense VI, Nr. 4047, S. 558.