Allen, die disen brief lesent oder ho^erent lesen, kúnd ich Hans von Múnchwille schulthaisse ze Wil¹ vnd vergih offenlich mit disem brief, daz fúr mich kamen ze Wil in der stat || fúr daz jar geriht, da ich offenlich ze geriht sass, die beschaiden kneht Hans der Kofman burger ze Wil vnd Eberhart sin brůder, vnd nament da Hainrichen || den Borhuser zu fúrsprechen vnd offenotent vnd veriahen da mit irem fúrsprechen, daz sú mit gůter beschaidenhait vnd vorbetrahtung durh Hainrichs dez Kofmans iro enins, || durch Hansen dez Kofmans iro vatters vnd durch iro vorderen vnd och durch ir sele willen vnd och luterlich durch got willeklich geben vnd gesetzet eweklich fúnf viertal kernen geltes gena^emes Wiler messes am lúpriester ze Wil an sine pfrůnde ab der wise gelegen nidenan vf Wilmat², genant dez Kofmans wise, dú obenan stosset an Mursellinun wise, die si het von der widem, vnd vndenan stosset an dez Hasen wise von Rikenbach³, mit der beschaidenhait, daz an ieglicher bestater lúpriester vf der kilchun ze Wil in der stat vnd ze sant Peter vor der stat⁴, der och die selben kilchan besinget, dú fúnf viertal kernen geltes ja^erklich an sine pfrůnde immer me nemen han vnd niessen sol ab der vorgenandun wise vnd von den nútzen, die da von geuallent, ane alle wider rede, vnd sol och^a) der selbe lúpriester, wer denne lupriester ist, der vorgenandun Hainrichs, Hansen vnd aber Hansen vnd Eberhartz der Kofmanne von Wil jarzit vf den tag, als ez geuallet vnd gelait wirdet, jarklichen kúnden vnd began mit drin missan, ob er die priester han mag, ane alle geua^erde, ta^eti er dez nút, so hant Hans vnd Eberhart die Koman^b) gebrůder vnd iro erbun gewalt, dú fúnf viertal kernen geltes ze geben anderswa hin durch got, war sú went, an wider rede. Nú sie Hans von Edangswille⁵ burger ze Wil iro gemainder zů der selbun wise, so wa^eri och der obgenande Eberhart noch ze sinen vollen jaren nit komen, vnd baten inen eruaren an offenem geriht, wie sú daz vorgescriben kernen gelt vnd selegera^ete an die obgenandun pfrůnde gen vnd vertegen so^eltint ab der ob genandun wise, dú iro aigen wa^eri, daz ez kraft vnd maht hetti nu vnd hie nach, do fragt ich vorgenander ritter vrtailde vmb, vnd wart ertailet mit gemainer vrtailde, daz sú ez tůn so^eltint mit Hansen von Edangswilles iro gemainders willen zů der wise, der och selber da ze gegen stůnt vnd och sinen vollen willen vnd gůten gunst dar zů gab vor dem geriht, sinem tail an der selbun wise vnscha^edelich, vnd daz Hans Kofman daz vorgenande kernen gelt mit siner hand ledeklich vf gen so^elti vor dem geriht an die obgenanden pfrůnde, daz er och da willeklich tet, vnd daz Eberhart der Kofman, sit er ze sinen vollen jaren vnd tagen nit komen wa^ere, ainen vogt nemen so^elti mit sines egenanden brůder willen v´ber dise sache, vnd so^elti och da mit sines vogtes willen rat vnd hand vnd och mit siner hand dú fúnf viertal kernen geltes ledeklich vf gen an die vorgenandun pfrůnde, der nam Hansen Lo^enberg burger ze Wil ze vogt in diser sache mit sines egenanden brůders willen vnd gunst vnd gab da mit sines vogtes willen rat vnd hand vnd och mit siner hand dú vorgescriben fúnf viertal kernen geltes ledeklich vf an die obgenandún lúpriester pfrůnde mit aller beschaidenhait, als vor ist gescriben, vnd entzigent sich da Hans der^c) Kofman vnd Eberhart sin brůder mit sines vogtes willen rat vnd hand aller der reht vorderung vnd ansprache, so su ald iro erben zů denan obgenanden fúnf viertal kernen geltes ie hettunt ald gewunent ald hie nach immer han ald gewinnen mo^ehtint vf gaistelichem ald vf weltelichem geriht, vnd baten mich die obgenanden Koman^b) gebrůder, Hans Lo^enberg vogt in diser sache vnd Hans von Edangswille gemainder zů der obgenandun wise ernstelich, min insigel henken ze ainem waren vrkúnd aller vorgescribener ding an disen brief, vnd ze merer sicherhait aller vorgescribener ding henk ich min insigel an disen brief. Wir Hans vnd Eberhart die Kofman gebrůder, Hans Lo^enberg vogt in diser sache vnd Hans von Edangswille gemainder zů der obgenandun wise veriehint ainer gantzen warhait aller der ding, so der obgenande schulthaisse von v´ns an disem brief veriehen het, vnd ze merer sicherhait der selbun ding henken wir Hans Kofman, Hans Lo^enberg vogt in diser sache vnd Hans von Edangswille gemainder zů der vorgenandun wise v´nserú insigel an disen brief, vnd won ich Eberhart Kofman aigens insigels nit han, so bind ich mich an disem brief vnder Hansen Lo^enberges mines vogtes insigel in diser sache, a^ellú vorgescriben ding sta^et ze halten. Dis geschach vnd wart dirre brief geben ze Wil in der stat an der na^ehstun midechun vor sant Margaretun tag, do von gottes gebúrt warent drútzehenhundert jar, dar nach in dem siben vnd vierzigosten jare.

Source Fulltext: Chartularium Sangallense VI, Nr. 4042, S. 553-555.