Wir V^olrich, Branthoch, Eberhart vnd Johans genant die Saxer gebrůder¹ kúndin vnd vergehin offenlich an disem gegenwúrtigen || brief allen den, die in sehent alder ho^erent lesen, daz wir vrilich vnd vnbetzwungenlich vnd mit gůter williger vorbetrachtung fúr alle || v´nser vetterren², fúr v´ns selber vnd fúr alle v´nser erben vnd nahkomen vffgeben habin vnd mit disem v´nserm brief vffgebind || der erwirdigen frowen . . der a^ebtissenne vnd dem gotzhus ze Lindow³ alle die aigenschaft, alle die lehenschaft, alle die vordrung, alle die ansprach vnd a^ellú dú recht, die v´nser vetterren ald dehain v´nser vordern ald wir ald dehainr v´nser erb ald nahkomen an der vogtay ze Balgach⁴ im Rintal v´ber lút vnd gu^eter, die darzů geho^erent, hattent ald habin^a) vnd han soltent, vnd habin v´ns o^vch der hút ze tag, als dirre brief geben ist, gen der vorgedachten frowen . . der a^ebtissenne vnd gen dem gotzhus ze Lindow iemer me eweklich entzigen mit allen rechten gar vnd ga^entzlich, vnd ist das alles geschehen mit worten mit geta^eten vnd an den stetten, als wir billich vnd von recht soltent vnd mochten, nah gaistlichem vnd nah weltlichem recht und wie recht ist, a^vn alle geuerde, vnd mit namen also, das weder wir noch v´nser vetterren noch v´nser erben noch nachkomen enkainr niemer me an der vorgedachten vogtai ze Balgach vnd was dar zů geho^ert, enkainv´ recht noch enkain vordrung vnd ansprach niemer súlin haben weder súst noch so. Dez vnd waz hie vorgeschriben stat ze offennem vrkúnd der warhait geben wir vorbenempten Saxer V^olrich, Branthoch, Eberhart vnd Johans gebrůder disen gegenwurtigen brief besigelt mit v´nseren aigenen insigelen. Der geben ist ze Lindow an dem nehsten samstag nah sant Jacobs tag ze ho^ewot in dem jar, do man zalt von Crists gebúrt drúzehen hvndert jar vnd in dem sibenden vnd viertzigostem jar.

Source Fulltext: Chartularium Sangallense VI, Nr. 4043, S. 555.