Allen den, die disen brief sehent lesent oder ho^erent lesen, tůn ich Johans der Meldegger¹ kunt vnd vergich offenlich an disem brieue fúr mich vnd fúr alle min erben vnd nachkomen, || wan der erwirdig min gena^ediger herre von gottes gnaden abt Herman² des gotzhus ze sant Gallen, herr V^olrich von Enna probst vnd phleger³ des selben gotzhus vnd min || herren alle gemainlich von dem conuent ze sante Gallen von den gnaden, die sú besunder zů mir hant, mich behuset hant uffen der burg ze Appacelle⁴, darumbe han || ich mit gůter vorbetrahtunge vnd beschaidenhait willeklich mit ir aller willen vnd gunst gesworn ainen gelerten ait ze den hailgen mit ûf gehabenr hant, dem vorbenemtem minem herren herr V^olrichen von Enna mit der selben vesti ân alle geua^erde getrúlich ze wartenne vnd in vnd alle, die er dar schikket, in vnd ûs ze lassenne gewaffent vnd vngewaffent, wenne vnd wie dik er wil, vntz uf den na^ehsten sant Benedictes abent ze mertzen vnd darnach sehs jar, dú aller na^ehst nach anander koment, ist das er also lange phleger ist vnd belibet des vorbenemten gotzhus. Gescha^ech aber, das er stu^erbe ald nút fúrbasse phleger wolte sin ald in min vorbenemter herr abt Herman vnd min herren von dem conuent alle gemainlich ald der mertail vnder in verstiessin von der phleg vnd nút fúrbasse ze phleger woltin han, wenne das gescha^ech inrent dem vorgeschriben zil vnd jaren, so sol ich dem vorbenemten minem herren abt Herman vnd minen herren allen gemainlich von dem conuent vnd minem herren herr V^olrichen von Enna mit inen, ob er lebt, bi dem selben aide ân alle geua^erde getrúlich wartan mit der selben vesti vntz an ainen ainwelligen phleger in allem dem recht, als ich dem vorbenemten herr V^olrichen von Enna wartan sol in dem zil, so er phleger ist, als vor beschaiden ist. Es wa^er danne, das disú sehs jar ûs wa^erin, dú nach dem na^ehsten sant Benedictus abent ze mertzen aller na^ehst nach anander koment, so sol ich minem herren abt Herman sunderlich vnd nieman andern, wan dem er mich haisset, mit der selben vesti wartan bi dem selben aide in allem dem reht, als vor ist beschaiden. Wa^er o^vch, das min vorbenemter herre abt Herman sturbe inrunt dem vorgeschriben zil vnd jaren, wenn das gescha^ech, so so^elt ich minem vorgenemten herren herr V^olrichen von Enna vnd minen herren allen gemainlich von dem conuent bi dem selben aide mit der vesti getrúlich wartan in allem dem reht, als vor ist beschaiden, vntz an ainen ainwelligen abt ald phleger, vnd so^elte ir kainem sunderlich fúrbass gebunden sin denn dem andern. Ich han och gelopt bi dem selben aide, wa^er das mich min vorbenemter herre herr V^olrich von Enna verstiesse von der behusunge ze Appacelle, das ich die selben burg anhainem, den er da behúset, in antwûrten sol, ê das er gesweret ainen gelerten aid ze den hailgen mit uf gehabenr hant, allú disú vorgeschriben dinge ze haltenne vnd ze vollefu^erenne ân alle geua^erde, vnd ê das er als mangen erberen wern vnd tro^ester git, als ich geben han, mit der vesti ze tu^enne, das ich ietzo tůn sol. Ich han ouch dem vorbenemten minem herren abt Herman, herr V^olrichen von Enna vnd min herren allen gemainlich von dem conuent ze ainer merun sicherhait aller diser vorgeschriben dinge dis ersamen lút Johansen von Luterberg, den man nemmet der Phulwe⁵, V^olrich den Giel von Glatburg⁶ vnd Johansen von Horwen⁷ geben ze wern vnd ze tro^ester, vnd hant die gesworn ir iegkliche besunder ainen gelerten aid ze den hailgen mit ûf gehabenr hant, wa^er, das got wende, das ich diser vorgeschribenr dinge dehaines v´berfu^er vnd nút sta^et wo^elti han, das sú mich darzů twingen sont ân geua^erde, als verre sú es mit libe vnd mit gůt getůn mugent, das ich es vollefu^erre vnd sta^et lasse. Vnd ze ainem waren vrkúnde vnd gantzer sicherhait aller der vorgeschriben dinge so henke ich der vorgenemt Johans der Meldegger min insigel an disen brief fúr mich vnd alle min erben. Wir die vorbenemten Johans von Luterberg, V^olrich der Giel vnd Johans von Horwen veriehen offenlich an disem brief, das alles das war ist, das von vns an disem brief geschriben stat, vnd des^a) merer sicherhait so haben wir o^vch vnserú insigel gehenkt an disen brief. Der geben wart an sant Fidun tag, in dem jar, do man zalt von gottes gebúrt drúzehenhundert jar vnd darnach in dem sibenden vnd vierzigosten jar.

Source Fulltext: Chartularium Sangallense VI, Nr. 4049, S. 559-561.