Wir Karl von gottes [gnaden Romischer]^a) kúng zů allen ziten merer des richs vnd kúng zů [Beheim veriehen vnd tůn]^a) kund offenlich an disem brief allen den, die in sehen[t, ho^erent oder]^a) lesent, daz wir angesehen habent die nutzlichen dienst, [die der]^a) edel Fridrich graue zů Tockenburg¹ vnser lieber getruwer [vns]^a) vnd dem riche offt vntz her nutzlichen mit gantzem fliße geta^vn [hat]^a) vnd noch tůn sol vnd mag in kúnftigen ziten, vnd dar vmb [so erlo]ben^a) wir im vnd sinen erben von vnsern kúnglichen gnâden, da[z . . .]^a) hand anzeheben, alz dir brief geben ist, machen mugen vnd [. . .]^a) ainen zol vnder dem huse ze Straßberch², dz in dem byst[um von]^a) Cur gelegen ist, mit solicher beschaidenhait, dz sy ie von dem [so^vme]^a) trukner ko^vffmanschafft vnd hab sechs pfenning Costentzer múntz [vnd]^a) ie von dem so^vme nasser ko^vffmanschafft vnd hab drye pfenning der [selben]^a) múntze nemen mugen von allermenglich ân aller lúte widerred v[nd]^a) hindernúß, vnd den selben zol setzen wir dem vorgenanten Fridrich grâuen ze Tockenburg vnd sinen erben zů eynem rechten pfande fúr fúnfhundert mark silbers, daz si den innehaben halden vnd niessen so^ellen, vntz wir in die vorgenanten fúnfhundert mark gar vnd gentzlich verrichten vnd bezalen, vnd wenn wir oder vnser nachkomen an dem rich die selben fúnfhundert mark geben vnd verrichten, so sol derselb zol fúrbaß absin vnd von vnsern vnd des richs wegen noch von dheines mannes wegen nymmermer ingenomen noch geuordert werden, vnd dar vmb gebieten wir ernstlichen allen vnsern vnd des richs getruwen hohen vnd nidern, wie die genant syen, die nu sind oder kúnftig werden, daz si den vorgenanten Fridrichen vnd sin erben an diser obgenanten vnser gna^vd nicht hindern noch leidigen so^ellen, sunder sy lieplich^b) vnd gu^etlich fúrdern, alz liep in sy vnser kúnglich gna^vd ze behalden. Mit vrkúnd diß briefs versigelt mit vnserm kúnglichen insigel. Der geben ist zů Prage nach Crists gepurt drizehenhundert jar vnd in dem acht vnd viertzigosten jar, an der heiligen zwo^elffbotten abend Philippi vnd Jacobi, in dem andern jare vnserr riche.

Source Fulltext: Chartularium Sangallense VII, Nr. 4080, S. 13-14.