Allen den, die disen gegenwurtigen brief an sehent oder horent lesen, kúnd ich Syfrit der || Tumber¹ vnd vergihe des offenlich an disem brief fúr mich vnd alle min erben, daz ich dem || edeln herren graf Ffriderich von Tockenburg² vnd fro Kúngunt von Tockenburg³ siner || elichen wirten vnd iren erben ze koffen geben han reht vnd redlichen Hainrichen den snider von Schiers⁴ vnd Johansen sinen brůder, herr Hainrichs sailgen des phaffen von Schiers sún, fúr reht aigen vmb sechzehen mark Kurwa^elscher⁵ marken, der ich gar vnd ga^entzlich von inen gewert bin vnd in minen gůten redlichen nutz bekeret sint. Ich bind och mich vnd alle min erben dar zů mit disem brief, daz ich oder min erben, ob ich enwere, der vorgenanten Hainrichs von Schiers vnd Johansen sins brůders reht wern sin sont fúr reht aigen an gaischlichen vnd an weltlichen gerihten vnd an allen stetten, wa sin min obgenanter herr graf Ffriderich von Tockenburg oder fro Kúngunt von Tockenburg sin elichú wirtenn alder iro erben des bedurfent oder notdurftig sint. Ich verzihe vnd entzihe mich och fúr mich vnd alle min erben alles des rehten vnd ansprach, so ich oder min erben iemer gehan oder gewinnen mo^ehtind in kaines wegs an die obgenanten Hainrichen vnd Johansen von Schiers. Ich verzihe vnd entzihe mich och fúr mich vnd alle min erben alles des rehten, da mit ich oder min erben wider den obgeschriben koff komen mo^ehtind in kaines wegs, das es dem vorgenanten graf Ffriderich von Tockenburg alder fro Kúngunt von Tockenburg siner elichen^a) wirtinn alder iren erben schad gesin mo^eht in kaines weges. Vnd des ze warem vnd offem v´rkúnd vnd sta^etter sicherhait, daz dis alles war ist, so henke ich der obgenant Syfrit der Tumbe min aigen insigel offenlich an disen brief, der ze Liehtenstaig⁶ geben wart, do man zalt von gottes geburt drúzehenhundert jar, dar nah in dem ahtvndvierzgosten jar, an dem zinstag nah aller hailgo tag.

Source Fulltext: Chartularium Sangallense VII, Nr. 4099, S. 32.