Allen den, die disen gegenwúrttigen brief ansehent lesent oder ho^erent lesen, tůn ich V^olrich von A^emptz¹ der alt ritter kunt vnd vergich offenlich an disem brief fúr mich vnd fúr all min erben, dz der erwirdig herre von gottez gnâden apt Herman dez gotzhus zu sant Gallen² mich gentzlich vnd gar mit baren vnd beraiten pfeningen gewert hât hundert march vnd zehen march gůtes vnd gene^ames silbers Costentzer gewicht vnd allez dez schaden, so ich ald yeman von minen wegen ald an miner statt dauon gehept vnd empfangen haben, die er mir schuldig wz vnd gelten solt von dez dienstes wegen, so ich im vnd dem obgenanten gotzhus ze sant Gallen gelobt hatte ze tu^end in dem krieg, den er hatte mit den herren grauen Hugen vnd grauen Růdolff von Montfort³ von kaiser Ludwigs seligen wegen, vnd dz er noch dz obgenant gotzhus mir noch minen erben dauon noch dabi noch von enkainem schaden, so daruff gangen ist ald ich ald iemant von minen wegen dauon gehept haben, nút mer schuldig ist noch gelten sol noch widergeben. Bescha^ech aber, dz ich ald min erben vmb dz obgeschriben silber ald von der vorgeschriben sach wegen nun ald hienâch dehain brief fundin, die brief sont mir noch minen erben kain fromm nútz noch gůt sin weder vff gaistlichem noch vff weltlichem gericht noch âne gericht vnd dem vorgenanten minem herren apt Herman sinen nâchkomen vnd dem gotzhus vnscha^edlich. Vnd ze ainer wârhait aller der vorgescriben sach gib ich V^olrich von A^emptz da vorgenant ritter dem vorgenanten minem herren abt Herman sinen nâchkomen vnd dem gotzhus fúr mich vnd all min erben disen brief besigelt mit meinem aigenn insigel. Der geben ist ze sant Gallen in dem jâr, do von gotez gepúrt wârent drútzehen hundert jâr, viertzig jâr vnd darnâch in dem núnden jâr, an sant Gregoryen tag.

Source Fulltext: Chartularium Sangallense VII, Nr. 4110, S. 40.