Wir Herman von gottes gnaden abt des gotzhus ze sant Gallen¹ tůn kunt vnd veriehen offenlich an disem brieue allen, die in sehent lesent oder || ho^erent lesen, das fúr vns kam Hainrice von Husen², Hainrichs selgen sun von Husen, mit sinem brůder Johansen von Husen sinem vogt, do || wir ze gericht sassen, vnd veriach offenlich vor vns, das er redlich vnd recht verko^vft vnd ze ko^vffen geben hette den erbern vnd wolbeschai||den fro Katherinun siner můter, wilunt Hainrichs selgen von Hûsen elichen wirtinnen, Gerhart dem Paier burger ze Costentz vnd Elsbethun siner elichun wirtinnen den zehenden ze Albraswille³, das gu^etli gelegen ze Nidren Búrron⁴, das gu^etli gelegen vor Búrrwalt⁵ vnd das gu^etli ze Mûtwille⁶ gelegen, dú sines vatter selgen Hainrichs von Husen warent, mit allen rechten, nútzzen vnd gewonhaiten, so darzů vnd darin geho^erent gantzlich ald in dehainen tail, vmb drissig phunt vnd vmb aht phunt phenning gůter vnd ga^eber Costentzer múnse, der er gantzlich von in gewert wa^er vnd emphangen hette vnd an sinen offen nutz bekeret, vnd hette dis getan mit sines vorbenemten vogtes willen vnd gunst, vnd nam der selb Hainrice mit sines vorbenemten vogtes willen Johansen Wildrichen burger ze sant Gallen ze fúrsprechen, der batte vns, das wir erfu^erin an gemainer vrtailt, wie der vorgenemt Hainrice dú vorgeschriben gu^eter den vorgenemten fro Katherinun siner můter, Gerhart dem Paier vnd Elsbethun des selben Gerhartz elichun wirtinnen vertgon vnd in ir hant bringen so^elt, das es kraft hette nu vnd och hienach. Das taten wir, vnd wart ertailt an gemainer vrtailt, das er das mit sines vorbenemten vogtes hant vnd och mit vnser hant willen vnd gunst tůn so^elt. Darnach do gab der vorgenemt Hainrice mit sines vorbenemten vogtes hant dú vorgenemten gu^eter vnd den egenemten zehenden an vnser hant ûff mit allen rehten, won sú och lehen sint von vns vnd vnserm gotzhus, vnd baten vns, das wir dú selben vorgenemten gu^eter mit allen rechten, so darzů geho^erent, lihen den vorgenemten fro Katherinun siner můter, Gerhart dem Paier vnd siner wirtinnen Elsbethun gemainlichen ze rechtem lehen. Do erhorten wir ir bette vnd namen dú vorgenemten gu^eter den zehenden ze Albraswille, das gu^etlin gelegen ze Nidrenbúrron, das gu^etlin gelegen vor Búrrwalt vnd das gu^etli gelegen ze Mûtwille, dú Hainrichs selgen von Husen warent, von in ûff vnd lúhen sú vnd lihen mit disem brief den vorgenemten fro Katherinun, Gerhart dem Paier vnd Elsbethun siner elichun wirtinnen gemainlichen ze rechtem lehen mit allen rehten vnd gewonhaiten, so darzů geho^erent, vnd ist dis alles beschehen mit worten vnd mit werken, so darzů gehort von reht vnd von gewonhait. Vnd des ze ainem waren vrkúnde vnd gantzer sicherhait aller der vorgeschriben dinge so henken wir vnser insigel an disen brief. Wir die vorgenemten Hainrice von Hûsen vnd Johans von Husen sin brůder vnd sin rehter vogt vnd Johans Wildrich sin fúrsprech veriehent ainer gantzer warhait aller der vorgeschriben dinge, so von vns an disem brief geschriben stant, vnd des ze merer sicherhait so henk ich Johans von Husen des vorgenemten Hainrices mines brůders vogt fúr mich vnd fúr in min insigel an disen brief, won er aigen insigel nicht hatte, vnd ich Johans Wildrich fúrspreche, als vorgeschriben stat, henk och min insigel an disen brief ze ainem waren vrkúnde der vorgeschriben sache. Der geben wart ze sant Gallen in der stat an der mitwuchen ze ingentem aberellen in dem jar, do man zalt von gottes gebúrt drúzehenhundert jar, vierzig jar vnd darnach in dem núnden jar.

Source Fulltext: Chartularium Sangallense VII, Nr. 4115, S. 44-45.