Allen den, die disen brief sechent oder ho^erent lesen, kúnde ich Cůnrat der Stûder vogt ze Gru^eningen¹ vnd || vergich offenlich an disem brief vmb den stôs, so die geistlichen frowen die a^ebtischin vnd der convent gemeinlich des || gotzhûs ze Wurmspach² des orden von Cytel hatten mit Cůnrat Kisling von ir hofes wegen ze V^esicon³, des || stosses sint sú lieblich vnd mit ir beider teilen willen vnd wissent gentzlichen berichtet mit solicher bescheidenheit vnd vs genanden worten, daz Cůnrat Kisling den vorgenand hôf enpfangen hat von dien vorgenanden frowen ierlichen ze cins innen da von gebenne acht mu^et kernen Zúricher messes gůtes vnd gebes vf sant Martis tag oder dar nach in acht tagen an allen fúrzůg, zwei hu^enrr vnd hůndert eijer ze dien ôsteran, tete er daz nút, so hant die vorgenanden frowen von Wurmspach vollen gewalt den vorgenanden hôf ze besetzzenne vnd entzetzenne, als es innen wol fu^eget vnd kůnt, vnbeku^enbert gar vnd gentzlich von Cůnrat Kisling, es ist beret, daz er den egenanden hof vnwu^estlichen vnd mit gůten eren mit bůwe haben sol an alle geuerde. Vnd des ze merer sicherheit, so hat er dien vrowen von Wurmspach ze tro^estern vnd ze búrgen geben Ru^od. Brůn von Gru^eningen vnd Heinrichen Múrrin von V^esicon. Vnd won dis alles beschechen ist vor offem gericht ze Gru^eningen mit miner hant, als vrteil vnd recht gab vnd als sit vnd gewonlichen ist ze Gru^eningen, so han ich dûrch bet der vorgenanden lútten beider teilen disen brief offenlich besigelt mit minem insigel ze offennem waren vrkúnd alles des, so hie vor geschriben ist. Der geben wart, do man zalt von gottes gebúrt drúzechen hůndert viertzig vnd nún jar, an dem nechsten mentag nach sant Georijen tag, do ze gegen waren Cůnrat vnd Heinr. die Amman von Griffensew⁴, Jos vnd V^olr. Wetzel, Wernher von Loppen⁵ vnd ander erber lút.

Source Fulltext: Chartularium Sangallense VII, Nr. 4119, S. 49.