Wir die stet Avgspvrch, Vlme, N^erdlingen¹, Werde², Costentz, ze sant Gallen, V^eberlingen³, Lindowe⁴, Ravenspvrch⁵, Bybrach⁶, Mêmmingen⁷, Kemptvn⁸, Kavffbv^ervn⁹, Livtkyrch¹⁰, Wangen¹¹, Bv^ochorn¹², Phvllendorff¹³, Bv^ochowe¹⁴, Rv^etlingen¹⁵, Heiltprvnnen¹⁶, Halle¹⁷, || Gemv^end¹⁸, Wile¹⁹, Winphen²⁰ vnd Winsperch²¹ veriechen alle offenlich vnd einmv^eticlich vnd tv^ein kvnt aller mênglich mit disem brieff, daz wir v^ens mit vereinbêrtem mv^ot svnderbar v^enserm gnêdigen herren kv^enk Karln von Rome vnd dem || riche ze lob vnd ze eren vnd dvrch gemeinen nvtz dez lands, v^enserr stet vnd v^enserr bvrger ze samen versprochen vnd verbvnden haben, diz pvntnv^ezze ze halten vnd ze habend mit allen bv^enden vnd rehten, als her nach an disem brieff || geoffnet vnd bescheiden ist, vnd also wer der wer, der vns vorgen(ante) stet ein oder me anraichti vnd v^ens von den gnaden rehten gwonheiten oder friheiten dringen wo^elt, die v^ens v^enser gnêdiger herre kv^enk Karl von Rome oder sin vorvarn am riche geben hant vnd dez wir brieff haben, oder von den gnaden, die v^ens noch me geben wv^erden, scheiden wo^elt oder dar an bekrankti, so svln wir alle gemeinlich mit v^enser aller hilff vnd mvgent vnd als verr v^enser aller lib vnd gv^ot reicht, ein ander trwlichen zv^o legen vnd beholffen sin, v^entz v^enser ieglich stat by den gnaden vnd rehten, dez div selb stat dez kv^engs brieff hat, vnverwert beliben ist. Wir sien ovch v^eber ein komen, daz wir zwein malen in dem jar ze Vlme vngemant vff den ayd ze samen komen svln, daz ist ieds jars vff sant Gallen tag vnd vff sant Waltbvrg tag, von v^enser ieglicher stat zwen, mit ein ander da ze reden, wez wir alle gemeinlich oder v^enser oder ieglich stat notdv^erftig sien. Vnd sien ovch vmb kein alt schvld ein ander nihtz gebvnden ze helffen denne als verr wir ez von gnaden tv^en. Vnd wenne ovch v^enser stet ein oder me an lv^eten oder an gv^oten widerehtz geschadget wv^erd, zv^ wem daz geschêhe oder wahin daz geschêhe, vnd sich div selb stat nach dem merern teil dez ratz erkanti, daz dar vmb ze manend wêr, so svlnt die von Avgspvrch zwen bvrger von ir stat dazv^o schikken, die von Costentz einen, die von Vlme einen, die von Nôrdlingen einen, von den steten iennent Alb²² von Rv^etlingen einen, von Heiltprvnnen einen, von Halle einen, von Gemv^end einen vnd von v^ens den obern steten von V^eberlingen einen, von Ravenspvrch einen, von Mêmmingen einen vnd von Bybrach einen, vnd welch stat vnder v^ens ein oder me, wie dik ez dazv^o kêm, geschadget wv^erd an lv^eten oder an gv^ot mit rob mit brand mit vnrehtem nemen widerehtz oder wer die hvset oder heimet, der hat die selben schvld, so sol vnd mag div selb stat, div den schaden lidet, ob sich der merer teil dez ratz da dar vmb erkent vff den ayd, die vorgescriben drizehen man dar vmb manen vff einen tag, der in benemt wirt gen Vlme, vnd svlnt denne die gemanten, als dik ez ie dazv^o kêm, vnverzogenlich komen vnd den ie da nider sitzen, ob ir der merer teil dar kvmt, vnd ir ieglicher ze den heiligen einen gelerten ayd sweren, daz si sich erkennen, niemen ze lieb noch ze leid vngevarlich, waz vmb die selben tat ze tv^ond oder an ze griffend si, vnd welch hilff si einer ieglichen stat vnder v^ens schephend oder wez sich die drizehen oder ir der merer teil vmb ein ieglich tat, die v^ens widerehtz an viel, erkennent, dar vmb si gemant werdent, dez svln wir alle gemeinlich ein ander hilfflich gevo^elgig vnd gehorsam sin ze tv^end ane alle widerred. Wêr ovch, daz iemen in dem creiz, als sich diz pvntnv^ez strekt, an lib oder an gv^ot widerehtz geschadget wv^erd, by welher stat oder vmb welhi stat da geschêhe, wie dik ez dazv^o kêm, so mag div selb stat, ob sich der merer teil dez ratz da erkent, daz ez gv^ot getan ist, dez selben tags oder der selben nêht zv^o frischer tat tv^on, waz si kan vnd mag, vnd mag ovch div selb stat zv^o frischer tat manen als vil v^enserr stet vngevarlich, v^entz si die frischen tat geobern mag, vnd welch stat dez ersten tags oder nêht zv^o frischer tat nit têt vnd daz lenger verzogen wv^erd, die sol vnd mag denne manen, als vor bescheiden ist. Ez ist ovch geredt, wêr daz iemen geschadget wv^erd, die in diser pvntnv^ez sint, von wem oder von welhen sachen daz beschêhe widerehtz, die selben svlnt daz den steten, die in diser pvntnv^ez sint, verkv^enden vnd kvnt machen mit iren offenn brieffen. Vnd swenne die dez geindert werdent vnd daz der selben deheiner, die den schaden getan heten, zv^o in komen oder wandelnt, so sint si gebvnden vff den aid, den selben ze habend vnd ze haltent mit so^elchem ernst, als ob in der schad beschehen wêr. Wêr ovch, daz iemen mit dem rehten verderbt wv^erd, wo^elt iemen vint dar vmb sin, der sol in den schvlden sin als iener, der mit dem rehten verderbt ist. Vnd wa man ovch einen schêdlichen man weiz, swer den an grift oder vff hebt, der ist niemen nihtz da von gebvnden noch schvldig. Man sol ovch wissen, daz niemen fv^etern sol deweder mit nemen noch mit bitten, denne da er dvrch reht fv^etern sol. Wêr ez dar v^eber tv^ot, den sol man fv^er schêdlichen han. Wir sien ovch svnderbar dvrch zvht vnd dvrch lvter gv^ot ze rat worden vnd v^eber ein komen, wenne ez dazv^o kêm oder wie dik sich daz fv^ogti, daz sich die drizehen oder ir der merer teil eins vszogs erkanten, so sol ein ieglich stat die iren vnd iren vszog also besachen vnd besorgen, div selb stat si ze veld zv^o andern steten komen oder si lig besvnder, daz si iemen ihtz nemen oder schaden tv^een ane fv^oter vnd ane kost, daz in reisen nit ze miden ist, vnd sol ovch ein ieglich stat vnder vns die iren vnderwisen vnd svnderbar besorgen, daz ir deheiner deheinen alten stoz oder haz rv^or oder reche oder dehein ander swêr sache an griff, denne dar vmb man vskomen vnd gemant wêr, ane der rête oder dez merern teils der rêt vrlob vnd heissen, die denne ze veld da ligend. Welhi daz allez v^eberfv^eren, die svlnt gebessert vnd gebv^esset dar vmb werden, als sich die drizehen oder ir der merer teil dar vmb erkennent. Wêr ovch, daz wir iemen besitzen schadgen oder bekv^enbern wo^elten von frischer tat wegen oder nach der drizechner oder ir dez merern teils erkennen, wer die wêren, die den^a) selben v^ensern widersachen, die v^ensern schaden geworben oder getan heten, vnd den hilff bêr mit kost mit lv^eten oder mit gv^oten, so sol vnd mag ein ieglich stat vnder v^ens, die in aller nêhst gelegen ist oder welch stat v^ender v^ens weg dazv^o hat, die selben an griffen an ir lv^eten vnd gv^oten vnd die hilff wenden, als verr v^enser ieglich stat kan vnd mag. Wêr ovch, daz ein brvch oder ein stoz vnder vns steten, als wir vorgen(ant) sint, vff stv^end, daz got behv^et, wie dik daz geschêhe oder ob in den steten vnder v^ens misshellvng oder vff lavff geschêhe, wie dik ez dazv^o kêm, daz got wend, so hant die sto^essigen stet ze beider sit vnd ovch die sto^ezzigen in den steten ovch ze beider sit oder ir der ein teil, welhi wend, gwalt dar vmb die drizehen ze manen, vnd so die ir sto^ez vernement vnd verho^erent, wez sich die denne dar vmb erkennent vnd welher rihtvng si v^eber ein koment dar vmbe oder ir der merer teil, dez solnt die sto^ezzigen ze beider sit gevo^elgig vnd gehorsam sin ze tv^ond ane alle widered, vnd wedre^b) teil daz sparti, so svln wir alle gemeinlichen dem gehorsamen zv^o legen vnd beholffen sin vnd den trivlichen friden vnd schirmen. Ez ist ovch beredt, wêr daz von v^ens steten einer me vszo^eg oder besitzvng^c) beschêhe, wie dik daz geschêhe, so sol div selb stat^d), die der stoz an gat, vnd zwo die nêhsten stet darlichen kost vnd gelt, dez man da ze antwerken ze bv^ewen vnd zv^o andern gerv^esten bedarff, vnd swenne sich der nêhst monod ergangen hat, so wir da von gescheiden sien, so mv^egent die selben stet, die die kost vnd gelt dar gelichen hant, v^ens die vorgen(anten) stet ze Vlme in die stat manen vff^e) einen tag, der v^ens denne benemt wirt, vnd svln da denne die selben kost vnd gelt, daz dar vff geben vnd geleit ist, v^enser ieglicher stat nach ir gwonlichen stivr, der si dem riche gebvnden ist, an legen, vnd waz also einer ieglichen stat dar an^f) gebv^ert, daz sol ein ieglich stat da nach dez nêhsten monods gelten vnd rihten ane schaden vnd ane alle widered, vnd waz schaden da von vff stv^end, den sol div selb stat gelten vnd rihten, vnd waz vszo^eg iennent Alb geschêhe, die kost vnd daz gelt, daz dar vff gieng, daz svlnt die stet iennend Alb vsrihten, den andern steten ane schaden, ze glicher wise svlnt die andern stet daz selb ovch tv^on den steten iennend Alb ane schaden. Vnd waz ovch v^enser ieglicher stat hêsse oder vintschaft von diser pvntnv^ez vff stv^enden, dez man by der pvntnv^ezz oder nach der pvntnv^ez an der selben stat zv^o komen wôlt, so svln wir alle ein ander zv^o legen vnd beholffen sin by der pvntnv^ezze vnd der^b) nach v^entz der selb oder div selb stat der vintschaft gentzlich entladen werdent. Wir han v^ens ovch gwalt behalten, daz wir wol me lv^et edel vnd vnedel zv^o v^ens in diz pvntnv^ezze nemen mv^egen nach rat v^enser aller oder v^enser dez merern teils. Ez svlnt ovch die von Bv^ochowe diz pvntnv^ez mit allem reht han, ane daz si by v^enserr stet rêten deheinen svlnt han. Wir sien ovch v^eber ein komen, vmb welch sache die stet, die diz pvntnv^ez haltent, ze samen koment, so sol deheiner dehein svnder gesprêch noch rêt han, denne dez sich die stet gemeinlich oder ir der merer teil dar vmb erkennent. Ez ist ovch geredt, waz anderr pvntnv^ez vor vnder vns geschehen wêren oder noch me geschêhe, die mag man wol halten vnd han diser pvntnv^ez ane schaden. Svnderbar mv^egent vnd svlnt die von Costentz vnd die von sant Gallen ir pvntnv^ez²³, die si vor heten vnd noch hant mit den von Zv^erch vnd mit den von Schavffhvsen²⁴, halten vnd han, als div selb pvntnv^ez stat vngevarlich, vnd wenne sich div selb ir pvntnv^ez ergangen hant, so mvgent si denne die selben pvntnv^ez wol strekken, ob si wend, oder ander pvntnv^ez ovch halten vnd han, diser pvntnv^ez gentzlichen ane schaden. Vnd haben ovch diz pvntnv^ez mit allen vorgescriben stvkken volfv^ert vnd getan v^entz an v^ensers herren kv^enk Karls gnad mit der bescheidenheit, wêr daz v^ens v^enser herre kv^enk Karl dar vmb ze red satzti, er selb sin boten oder mit sinen brieffen, dez wir sinen kv^enchlichen gnaden nit getrewen, so svln wir ze samen komen vnd svln vns bedenken vnd weg sv^ochen, wie wir mit dez kv^engs willen vnd gvnst by diser pvntnv^ez beliben, wa daz aber nit sin mo^eht vnd v^ens der kv^eng sin gnad dazv^o nit erzeigen wo^elt, so mv^egen wir wol ein ander vnserr ayd erlazzen vnd diz pvntnv^ez gentzlichen ab lan. Vnd also haben wir die vorgen(anten) stet alle vnd vnser ieglich stat besvnder mit aller irr gemeind zv^o den heiligen gelert ayd gesworn mit vff geboten^b) vingern, diz pvntnv^ez mit allen vorgescriben bv^enden vnd rehten vnd als vor bescheiden ist stêt ze halten vnd ze haben vnd an allen vorgescriben stvkken ze volfv^eren vngevarlich von nv dem nêhsten sant Georien tag v^eber driv jar div nêhsten nach ein ander. Vnd dez allez ze einem waren vrkv^end haben wir die vorgen(anten) stet alle v^enser ieglich stat ir aygen insigel gehenkt an disen brieff, vnd ob der insigel etlichs brv^echig wv^erd oder ob ir etlichs an disen brieff nit kêm, dennoch sol in dirr brieff krefftig vnd gv^ot sin. Daz geschach an sant Lavrencien tag, do waren von gotz gebv^ert drivzehen hvndert jar vnd da nach in dem nivnden vnd vierzigistem jar.

Source Fulltext: Chartularium Sangallense VII, Nr. 4132, S. 57-61.