Allen den, die disen brief an sehent lesent oder ho^erent lesen, kúnt ich herr Bernhart der^a) schenk von^b) Landegge¹ ritter vnd vergich offenlich an disem brief fúr mich vnd fúr min erben, das ich mit gůter vorbetrahtung willen vnd dankes^c) gesunt mins libes reht vnd redlich den erberen vnd beschaidenan gaistlichen frowan der abtischennen vnd dem conuent gemainlich des klosters ze Maggenowe² ze ko^vfen geben han ain gv^ot, das gehaissen ist Datenwille³, vnd daz Than⁴ vnd was inrunt den marken ist, als der vndergang^d) beschah, das nahwendig der burg ze Landegge gelegen ist, da ainhalb an stosset Walaswanden⁵ vnd andrunthalb Bůch holtz⁶, mit allen nútzen rehten vnd gewonhaiten, als ich ez untz her genossen vnd gehebt han, mit aker mit wisan mit^e) wunne mit waide mit holtz mit velt mit brunnen mit ba^echen mit flussen mit wasser rúnsen mit steg mit weg vnd mit aller zůgeho^ert, vmb drissig phunt vnd vmb vier phunt gv^oter Costenzer pfenning, der sú mich gar vnd ga^entzlich gewert hant vnd in minen schinberen nutz bewendet han, ich enzih mich och an disem vnd mit disem brief fúr mich vnd min erben aller der reht vnd aller der gewonhait, so ich vntz her zv^o dem vorgenanten gůt gehebt han oder min erben nah mir gewinnen mo^ehtin an gaistlichem oder an weltlichem geriht mit reht oder an reht, ich sol o^vch daz vorgeschriben gv^ot den vorgenanten der abtischennen vnd dem vorgenanten convent des klosters ze Maggenowe vertgvn fúr reht aigen, so ich erst ze land kum, inrunt zwain manoden den na^ehsten, wie drie erber man, die dv´ vorgenanten abtischenne vnd der convent dar zv^o erwellent, den vmb dv´ reht kvnt ist, reht vnd billich dunket vnd als sin die vorgenanten dv´ abtischenne vnd der convent noturftig ist, bescha^eh aber, da vor got sie, das ich erstúrb vor der vertgung, so svnt min erber^f) der selbun vertgung gen den vorgenanten der abtischen vnd dem convent ze Maggenowe gebvnden sin vnd sont inen das vorgenemte gv^ot vertgon fúr aigen inrunt den na^ehsten zwain manoden nah mim tod, als da vor von mir geschriben stat, vnd hier vmb ze ainer merer sicherhait han ich den vorgenanten der abtischennen vnd dem convent ze Maggenoweze bírgen vnd ze tro^estern geben fúr mich vnd fúr min erben dis erberen nahgeschriben lút hern Cůnrat den schenken von Landegge⁷ rittern, hern Hansen von Haidelberg⁸ rittern^g), Hansen von Steinach⁹ vnd Cůrten den scheken^h)10, des ebenempten hern Cůnratz denⁱ⁾ schenken sun, die hant gesworn zv^o den hailgon ieklicher ain gelerten aid mit vfgehabenr^k) hant hern Amor von Lvterberg¹¹, Hainrichen von Eppenberg¹² vnd Hansen von Luterberg¹³, wenne ich ze lant komen wa^eri oder ersturbi, da vor got sie, vnd dv´ vorgenant vertgvng noch denne nit uon mir oder von minan erben v^s geriht wa^er, so hant die vorgenanten her Amor von Luterberg, Hainrich von Eppenberg vnd Hans von Lvterberg oder aine vnder inan die vorgenante burgen gewalt ze manen, vnd wenne sú von inen allen oder von aim vnder inen ermanat werdent mit^l) botten oder mit brieven ze hûs ze hof oder vnder ogen, so sont sú sich a^entwr^oten inrunt den na^ehsten vierzehen tagen nach der manung gen sant Gallen oder gen Wil¹⁴ in der stet ain, in weder sú went, in offern wirt húser ze vailem gůt vnd sont da laisten ain reht giselschaft ieklicher zwai mal an dem tag, vnd wele vnder inan nit selber mit sim lib laisten mo^ehti oder^m), der sol ain kneht mit aim maiden an sin stat legen ze laisten zwai mal an dem tag an alle geua^ert, vnd son niemer dannan komen, e das das vorgenemte gůtⁿ⁾ fúr aigen gevertgot wirt, als da vorberet ist, wa^er och, daz der búrgen kaine vnnv´tz wrdi, so sol ich der vorgenemt herr Bernhart der schenk oder min erben, ob ich enwa^er, denan vorgenanten der abtischennan vnd dem convent ze Maggenowe ain andern als gv^oten an dez stat geben, als der wa^er, der vnnútz worden ist, vnd wa ich des nit enta^et noch min erben, ob ich enwer, so hant aber die drie her Amor^o) von Luterberg ritter, Hainrich von Eppenberg vnd Hans von Luterberg gemainlich oder ir aine gewalt, die búrgen dikbenemten ze manen, als da vorgeschriben ist, die sont denne nach der manung laisten inrunt den na^ehsten vierzehen tagen in aller der wis, als da vor geschriben ist, an geua^ert vnd von der geselselschaft^p) niemer komen, die wil vnd der búrg nit geben noch v^s gerihtet ist, es ist och fúrbas beret, wa^er daz vnder den vorgenantan herrn Amor von Luterberg, Hainrichen von Eppenberg vnd Hansen von Luterberg, die walt hant die vorgenanten búrgen ze manen, ainr ab giengi oder vnnútz wrdi, so hant die vorgenanten dú abtischen vnd der convent ze Maggenowe vollen gewalt, ain andern erbern man an des stat ze nemen, der ab^q) gegangen vnd vnnútz worden ist, dem sont och denne die dikbenempten búrgen haft sin in aller der wîs, als sú dem waren, der ab gegangen vnd vnnútz worden ist, ist och, daz die búrgen tag fordront, wen denne^r) vnder^s) den vorgenemten drin aine, die walt hant die búrgen ze manen, tag git, so sont sú tag han, vntz das sv´ aber ermant werdent, als da vor beret ist, ân alle geua^ert, wa^er och, das ich oder min erben, ob ich en wer, wider disen dingen, als hie vorgeschriben^t) stat, iemer v´t getůn weltin, so enzih^u) ich mich mit minen erben aller der rehten, da mit ich mich an gaistlichem oder an weltlichem geriht geschirmen mo^eht, dis ist beschehen mit aller ehafti wort vnd werch, so dar zv^o gehort oder noturftig was von reht oder von gewonhait, vnd vmb ain offen vrkúnt aller der ding, so da vor an disem brief geschriben stant, henk ich der dikbenempt herr Bernhart der schenk von Landegge riter min insigel an disen brief, wir die vorgenemten búrgen her Cůrt der schenk von Landegge ritter, her Hans von Haidelberg ritter, Hans von Stainach kneht vnd Cůrt der schenk kneht veriehent alle gemainlich ainr warhait aller der ding^v), so der dikbenempt herr Bernhart der schenk von Landegg ritter da vor an disem brief von v´ns veriehen het, vnd zv^o ainr merer sicherhait aller vorgeschribenen dingen henken wir die dikbenempten búrgen v´nsrú aigen insigel an disen brief, der geben wart ze Maggenowe, do man zalt von gotz gebúrt druzehenhundert iar, vierzig iar, darnah in dem núnden iar, an dem na^ehsten fritag vor ingandem o^vgsten.

Source Fulltext: Chartularium Sangallense VII, Nr. 4131, S. 55-57.