Ich Joh(an)s von Langenhart¹ tv^on mangelichen ze wissenne, so disen brief sehent oder || ho^erent lesen, daz jvngher V^olr. von Mantzingen² ein frijer herre vnd Pfulwen von || Lvterberg³ an mich wurben, daz ich in diente mit etwien mangen ze rosse, vnd || waz daz der zit, do grave Joh(an)s von Habspvrg⁴ vnd grave Friderich von Toggenbvrg⁵ sto^essen sament hatten, do fragte ich si, ob es den von Toggenbvrg angienge, do sprachen si neines, do sprach ich aber zv^o in, sol ich v´ch nv dienen mit etwie mangen ze rosse, so fv´rchte ich hern Herman von Landenberg von Griffense⁶ vnd sin gesinde, daz die ettelichen nicht holt sin, so ich v´ch bringent wurde, do sprachen si aber, fv´rchte dir nicht dar vmb, wan er wirbet als vaste vmb die selben sache als wir, vnd schaffen dir vnd den dinen wol einen frid vor im die vart. Dv solt o^vch wissen, es si vnser herre graue Joh(an)s von Habspvrg ald her Herman von Landenberg von Griffense der elter oder ander, so vmb die selben sache werbent, daz vnser wol wirt fv´nfhundert beggelhube, vnd retten si als verre mit mir, daz ich weis fv´r war, daz daz selbe werben alles gieng vf die bvrger von Zv´rich, daz man in die stat Zv´rich gevallen wolte sin, vnd wil o^vch ich des bvrgermeisters vnd der bvrger von Zv´rich des wer sin, wo si des bedvrfen oder notdv´rftig sint. Vnd her v´ber ze vrkv´nde vnd ze einer offenen warheit so gibe ich dem bvrgermeister, dem rate vnd den bvrgern gemeinlich von Zv´rich disen brief mit minem insigel offenlich besigelt. Der geben wart an dem nechsten samstag vor sant Gallen tag, in dem jare, do von gottes gebv´rt waren drv´cehen hvndert vnd viertzig jar, vnd dar nach in dem nv´nden jare.

Source Fulltext: Chartularium Sangallense VII, Nr. 4142, S. 67-68.