xxx Universis sancte matris ecclesie xxx || filiis, ad quos presentes littere pervenerint, nos miseracione divina Gregorius Opidensis¹, Johannes Tribuniensis², Augustinus Destillariensis³, Adam Perperenensis⁴, Gregorius Salunensis⁵, Johannes Dracouarianus⁶, Anancius Xanchiensis⁷, Ffranciscus Vrehensis⁸, Thomas Tinniensis⁹, Johannes Termopolensis¹⁰, Ber||trandus Assisiensis¹¹ et Ffranciscus Acciensis¹² episcopi salutem in domino sempiternam. Splendor paterni luminis, qui sua mundum ineffabili illuminat claritate, pia vota fidelium de sua clementissima maiestate sperancium tunc precipue benigno favore prosequitur, cum devota ipsorum humilitas sanctorum meritis et precibus adiuvetur. Cupientes igitur, ut ecclesia parrochialis in Rikenbach¹³ prope Wile¹⁴ Constanciensis diocesis congruis honoribus frequentetur et a Christi fidelibus iugiter veneretur, omnibus vere penitentibus et confessis, qui ad dictam ecclesiam in singulis suorum patronorum festivitatibus et in omnibus infrascriptis videlicet natalis domini, circumcisionis, epiphanie, cene, parasceves, pasche, ascensionis, pentecostes, trinitatis, corporis Christi, invencionis et exaltacionis sancte crucis, in singulis festis beate Marie virginis, sancti Michaelis archangeli, nativitatis et decollacionis sancti Johannis Baptiste, beatorum Petri et Pauli apostolorum et omnium aliorum apostolorum et evangelistarum ac quatuor ecclesie doctorum, in festo omnium sanctorum, in commemoracione animarum et in dicte ecclesie dedicacione sanctorumque Stephani, Laurencii, Georgii, Martini, Blasii, Nicolai sanctarumque Marie Magdalene, Katerine, Agathe, Margarete et per octavas omnium festivitatum predictarum octavas habencium singulisque diebus dominicis et sabbatinis tocius anni causa devocionis, oracionis aut peregrinacionis accesserint, seu qui missis, predicacionibus, matutinis, vesperis, exequiis et sepulturis mortuorum aut aliis divinis officiis ibidem interfuerint, aut qui dictam ecclesiam vel eius cimiterium pro remedio omnium fidelium animarum, quorum corpora ibidem sepeliuntur, pie deum exorantes circuiverint, aut qui corpus Christi vel oleum sacrum, cum infirmis portentur, secuti fuerint, aut qui in serotina pulsacione campane genibus flexis ter ave Maria dixerint, necnon qui ad fabricam, luminaria et ornamenta dicte ecclesie manus porrexerint adiutrices, aut qui in eorum testamentis vel extra aurum, argentum, vestimenta, libros, calices aut quevis alia dicte ecclesie necessaria donaverint, legaverint seu donari vel legari procuraverint, et qui pro salubri statu Johannis de Brunberg¹⁵ armigeri dicte Constanciensis diocesis impetratoris presencium, dum vixerit, et pro anima eiusdem, cum ab hac luce migraverit, pie deum exoraverint, quocienscumque, quandocumque et ubicumque premissa vel aliquid premissorum devote fecerint, de omnipotentis dei misericordia et beatorum Petri et Pauli apostolorum eius auctoritate confisi singuli nostrum quadraginta dies indulgenciarum de iniunctis eis penitenciis misericorditer in domino relaxamus, dummodo diocesani voluntas ad id accesserit et consensus. In cuius rei testimonium sigilla nostra presentibus sunt appensa. Dat. Auinione, XXV^a. die mensis ianuarii, anno domini millesimo CCC°. quinquagesimo et pontificatus domini Clementis papeVI. anno VIII°.

Source Fulltext: Chartularium Sangallense VII, Nr. 4161, S. 85-86.