Allen den, die disen brieff an sehend lesent oder ho^errent lesen, kúnd ich Cůnrat der Albreswiler burger ze Wil¹ vnd vergich offenlich an disem brieff, dz ich mine(n) gnedigen herren abt Heinrich vnd dem conuent des gotzhus ze Rúti² des ordens von Premonstr(ey) in Cost(entzer) bistům alle die gu^eter stuk aker wisen vnd garten, die zů ira schůpuß gelegen ze Wil gehorrent ald dar in, die selb schůpuss min lipding ist von dem obgenanten gotzhus, vsgegangen gesúndert vnd vsbenempt vnd gezeiget han, als an disem brieff geschriben stat. Des ersten zwen garten gelegen in Wiler riet³ vnd ein wiß da bi gelegen, ist als breit als beid garten, vnd scheidet si beide ein bach, ein juchart akers gelegen an Wilberg⁴ ob der schwestren aker in der samnung⁵ vnd stosset uff des meren hoffes aker, drye juchart akkern gelegen bi dem Tússelenten brunnen³, ein juchart akers gelegen an dem Ro^vffbu^el³ zwúschent Hansen den^a) Weibels aker vnd Wiler moß³, ein ekerli heist der Tolakker³ ist gelegen vnder dem Ro^vffbu^el, ein juchart akkers gelegen bi der strass gen Túnbrunnen⁶ zwúschent des minren hoffs aker ze Wil, ein aker gelegen vorm Berkholtz⁷ stosset an den Stok weg³, ein wis gelegen ze sant Peter⁸ vor dem kilchhof giltet einen mút kernen Wiler mesß, ein wis gelegen an Wilmatt⁹ vor dem hag, da man gat gen Rikenbach¹⁰, zwo juchart akers an drin stuken gelegen zwúschent dem ku^eweg vnd dem húselweg, da man gat in die Owe¹¹, vnd ein juchart akers gelegen an Núlanden¹² an des Kouffmans bonaker, die gu^eter alle ze Wil vmb die statt gelegen sind, vnd das si vmb die vorg(enanten) gu^eter enkeinen argwan noch zwifel zů mir habint, so hab ich inen willenklichen geschworn einen gelerten eid ze den heilgen, das die vorg(enanten) gu^eter alle, die ich inen vsgangen gesúndert gezeiget vnd an disem brieff benempt han, zů ir vorg(enanten) schůpusß geho^errent vnd dar in, vnd das ich nit me noch fúrer weisß, das zů der selben schůpusß geho^erre ald dar in, vnd han o^vch in den selben eid willenklich genomen, das ich si noch ir nachkomen der vorg(enanten) gu^etern aker wisen noch garten enkeinen weg entfro^emden noch entwerren sol, das ich si ze lipding han vnd niessen sol a^vn geuerd vmb den zins, den ich inen da von jerlich geben sol, als iro brieff¹³ bewiset, den si von mir darumb innhand. Vnd ze merer Sicherheit aller vorg(enanten) ding henk ich Cůnr. der Albreschwiler min insigel offenlich an disen brieff. Der geben ist an donstag vor wienacht anno domini M°CCC°LI°.

Source Fulltext: Chartularium Sangallense VII, Nr. 4236, S. 144-145.