Allen, die disen gegenwúrtigen brief ansehent alder ho^erent lesen, kv´nde ich V^olrich von Husen¹ burger ze Costentz || vnd vergihe des offenlich an disem brief, daz ich mit gůtem willen vmbetwungenlich vnd mit gůter vorbetrahtvnge || nach miner gůter frvnde vnd ander erber lúte rate dem beschaiden man Egelolf dem Blarrer burger ze Costentz vnd || sinen erben vnd . . nachkomen ze koffent geben hab reht vnd redelich vnd ains ewigen rehten koffes minen zehenden, der gelegen ist ze Husen, vnd ainen akker vnd ain wise, die gelegen sint ze Búrren², vnd a^ellv´ lehen sint von dem . . abt vnd dem gotzhus ze sant Gallen, vnd waz darzů ho^ert, mit allen nútzen vnd gewonhaiten vnd mit allen rehten gesůchs vnd vngesůchs, als den selben zehenden vnd den selben akker vnd die wise min vordern an mich braht hant vnd als ich sv´ gehebt vnd genossen hab her vntz an disen hv´ttigen tag, also hab och ich dem egenanten Egelolfen dem Blarrer vnd sinen erben den vorgenanten zehenden, den akker vnd die wise ze koffent geben vmb fv´nf vnd sehtzek pfvnt gůter vnd gnemer pfenninge Costentzer mv´ns, vnd bin och der gar von im gewert vnd sint in minen redelichen nûtz komen vnd bekert, als ich vergihe mit disem brief. Vnd hab im och den selben zehenden, der gelegen ist ze Husen, vnd den akker vnd die wise, die gelegen sint ze Bu^îrren mit vffgend an mins herren des abtes hant von sant Gallen³ gefertigot mit allen den worten, werken vnd geta^eten, so darzů hort vnd notdúrftig waz nach gewonhait vnd nach reht. Vnd hab mich darv´ber verzigen vnd verzihe mich mit disem brief fúr mich vnd fúr alle min erben vnd nachkomen gen dem selben Egelolfen dem Blarrer vnd gen allen sinen erben vnd nachkomen an den vorgenanten gu^etern aller aigenschaft, aller lehenschaft, aller vordervnge, aller ansprach, alles schirmes, alles vszugs vnd aller hilf gaischelichs vnd weltlichs gerihtes, da mit wir ald iemân andre von v´nseren wegen dv´ vorgenanten gu^eter kv´ndin ald mo^ehtin angesprehen ald da mit wir dis êwigen redelichen koffes kv´ndin ald mo^ehtin wider komen ald in kaine wise gewenden, bekrenken ald gebrechen. Ich bin och vnd durh min bette Johans Fluri burger ze Costentz der egenanten gu^eter, als vor ist beschaiden, vnd dis ewigen redelichen koffes des vorgenanten Egelolfes des Blarrers vnd siner . . erben vnd nachkomen reht wern nach reht âne geuerde, vnd hab och dem selben Johansen Flurin gelobt, wie er von dirre werschaft, als er gelobt hat, ze schaden kvnt, daz ich vnd min erben in vnd sin erben da von so^elin âne allen ir schaden lo^esen. Ich vorbenenter Johans Fluri vergih darnach svnderlich an disem brief, das ich dis weschaft^b), als vor ist beschaiden, mit gůter trúwe gelobt hab âne alle geuerde. Vnd ze warem vnd offeme vrkv´nd vnd sta^eter vnd ewiger sicherhait aller dirre vorgeschriben dinge geben wir die selben V^olrich von Husen vnd Johans Fluri v´nserv´ insigel an disen brief. Der ist ze Costentz geben, do man von Cristes gebúrte zalte drv´zehenhvndert jar, darnach in dem ain vnd ffv´nfzigosten jar, an dem nehsten zinstag nach sant Gallen tag.

Source Fulltext: Chartularium Sangallense VII, Nr. 4233, S. 142.