Allen den, die disen brief ansehent lesent oder ho^erent lesen, kúnde ich Fridrich von Hagnow¹ vndervogt ze Bischoffcelle² vnd vergich offenlich an disem brief, || das fúr mich kam ze Bischoffcelle in der stat, do ich offenlich ze geriht sas an mines herren stat hern Johansen von Haidelberg³, fúr das geriht der ietz || benempt herr Johans von Haidelberg mit Iten von Stainah⁴ siner êlichen wirtinn vnd offenot da offenlich vor mir vnd an offenem geriht mit fúrsprechen, || das er willen hetti, vsser etlichen gu^etern, die der vorbenempten Iten siner êlichen wirtinn pfand warent vnd ir geuertgot warent von dem gotzhus ze sant Gallen, von dem sú lehen sint, etwas ze tu^end, vnd bat mich ze eruarn an ainer vrtaild, wie er das tůn so^elt, das ez kraft vnd maht hetti nu vnd hie nach. Da fragot ich vrtaild vmb, do ward vrtaillet mit gesamnoter vrtaild, das her Johans von Haidelberg sich siner vogtai entzihen so^elt gen Iten siner êlichen wirtinn vnd si ir na^ehsten vatter mag ze vogt nemen so^elt v´ber die sach, ob si in gehan mo^eht. Das beschach, als vrtaild vnd reht gab. Darnach nam dú vorbenempt Ita von Stainah mit her Johansens von Haidelberg ir êlichen mannes willen vnd gunst Johansen von Stainah⁵ ir brůder ze ainem vogt v´ber die sach, darnach offenot der selb ir vogt mit fúrsprechen, das sin swo^ester Ita von Stainah den houe, den man nemmet der Bůbahoue⁶, ze Zilschlat⁷ gelegen vnd die schůpůss an den Kûben⁶ vnd die zwo^a) schůpůssen ze Pintzen⁶, die in den selben houe ho^erent, vnd den hof, den man nemmet des Ômen hof, o^vch ze Zilschlat gelegen vnd den hof ze Vesersegg⁶, den man o^vch nemmet Hindranegg⁶, vnd a^ellú dú gu^eter, die in die vorgenemten ho^ef vnd schůpůssen geho^erent, mit allen rehten nútzen vnd gewonhaiten vf gen wo^elt ledklich vnd sich aller ansprach, so si hette ald haben mo^eht zů den vorgeschriben ho^euen vnd gu^etern, gar vnd gantzlich entzihen wo^elt an Bartholomeus des Blarers hand burger ze sant Gallen, der sú enphahen wolt an Johansen Wilderichs vnd Gerwiges des Blarers stat⁷, vnd batent mich, inen ze ervarn an ainer vrtaild, wie sú das tůn so^eltin, das es kraft vnd maht hetti nu vnd hie nach. Da fragt ich vrtaild vmb, do ward ertaild mit gesamnoter vrtaild, das sin^b) der selb ir vogt ze drin mâlen vsser dem ring fu^erren so^elt vnd sie fragon, ob si es willeklich vnd vnbetwungenlich tůn wo^elt. Das tett der selb ir vogt vnd sait och ir vogt bi dem aid, das si alweg spra^ech, si ta^et es willeklich vnd v^nbetwungenlich. Darnach gab dú vorgenant Ita von Stainah mit ir vogtes willen rât vnd hand dú vorgeschribenn ho^ef vnd gu^etern der Bůbahof ze Zilschlat vnd die schůpůssen an den Kûben vnd die zwo schůpůssen ze Pintzen, die in den selben hof geho^erent, vnd den hof, den man nemmet des Omen hof, vnd den hof ze Vesersegg, den man o^vch nemmet Hindrenegg, vnd a^ellú dú gu^eter, die in die vorgenemten ho^ef vnd schůpůssen geho^erent, mit allen rehten nutzen vnd gewonhaiten ledklich v´f vor mir vnd an offemm geriht an des obgenemten Bartholomeus des Blarers hand, der sú enphieng an Johans Wildrichs vnd Gerwiges des Blarers stat, als mit gemainer vrtaild ertaillet ward, vnd enzeh sich o^vch da dú dikbenempt Ita von Stainach hern Johansen von Haidelberg êlichú wirtinn vor geriht mit des vorgenemten Johansen von Stainach ir vogtes hand aller der reht vnd vordrung vnd ansprach, so si an die vorgeschriben ho^ef vnd gu^eter ie gehatt ald gewan ald si dar zů hie nach iemer gehan ald gewinnen mo^eht von reht ald von gewonhait ald von dehainer schlaht sach wegen. Si swůr o^vch offenlich vor geriht mit des vorgenemten ir vogtes vnd ir elichen mannes willen ainen gelerten aid ze den hailgon mit vf gehabner hand, das si dehain ansprach an die vorbenemten ho^eue noch an die gu^eter, so dar in geho^erent, niemer me han noch gewinnen sol weder mit gaistlichem noch mit weltlichem geriht noch ân geriht, vnd batent mich inen des gerihtes brief hie v´ber gen, ob es reht wa^er, der ward inen ertaillet mit gemainer vrtaild, vnd sint a^ellú disú vorgeschribenú ding beschehen vor mir vor offemm griht mit fúrsprechen vo^egten worten werchen vnd gehúgt ra^eten vnd geta^eten, so dar zů horten, gůt nútz ald frum warent vnd als mit gesamnoter vrtaild ertaillet ward. Vnd des ze ainem waren vrkúnd vnd sta^eter sicherhait aller vorgeschribenen ding vnd geding henke ich der vorbenemt Friderich von Hagenow vnder vogt ze Bischoffcelle min aigen insigel von des gerihtes wegen an disen brief, an den och ich Johans von Stainach, won ich vogt was in diser sach, min insigel henk ze ainem waren vrkúnd aller der ding, so von mir geschriben vnd beschaiden ist an disem brief. Ich dú vorbenant Ita von Stainach hern Johansen von Haidelberg êlichú wirtinn vergich ainer warhait aller der ding vnd geding, so hie vor von mir geschriben vnd beschaiden ist an disem brief, vnd das es alles war sie vnd sta^et belibe, so henk ich o^vch min insigel an disen brief fúr mich vnd fúr min erben. Der geben ward ze Bischoffcell in der stat an sant Valentis tag in dem jar, do man zalt von gottes gebúrt drúzehen hundert jar, dar nach in dem drú vnd fúnfzigosten jar.

Source Fulltext: Chartularium Sangallense VII, Nr. 4283, S. 177-178.