Allen den, die disen brief ansehent lesent oder ho^erent lesen, kúnd vnd vergich ich Johans von Haidelberg ritter fúr mich vnd alle min erben vnd nachkomen, daz ich willeklich mit bedâhtem můt vnd mit gůtem rât miner frúnde || vnd ander erber lút, den ich wol getrúwet, verko^vft vnd ze ko^vffenn geben han den êrberen vnd wolbeschaiden Gerwig dem Blarrer vnd Johansen Wildrich burgern ze sant Gallen reht vnd redlich in ko^vffes wise vnd namen, als man || gůt verko^vffet vnd verko^vffen mag vnd sol, den hof, den man nemmet der Bůbahof, ze Zilschlatt gelegen, vnd die schůppůs an den Kûben vnd zwo schůppůssen ze Pintzen, die in den selben hof geho^errent, vnd den hof, den man || nemmet des Omen hof, o^vch ze Zilschlatt gelegen, vnd den hof ze Vesersegge, den man o^vch nemmet Hindrenegge, den hof am Lên¹ gelegen an dem Riet², vnd den zehenden ze Râtzenwille³, der da gât ab dem hof, der des Schenken von Casteln⁴ ist, den der Túmpfler buwet, vnd a^ellú dú gu^eter, dú in die vorgeschriben ho^ef gu^eter schůppůssen vnd zehenden geho^erent, mit akkern mit wisan mit wasen mit zwi mit holtz mit veld mit waidan mit wasser mit wasserflússen vnd gengen vnd mit aller êhafti vnd mit allen rehten nútzzen vnd gewonhaiten, so zů den vorgeschribenen ho^euen gu^etern schůppůssen vnd zehenden ald darin geho^erent gantzlich ald in dehainen tail, also vnd mit den selben rehten vnd o^vch da fúr, das sú reht lehen sint von ainem abt vnd dem gotzhus ze sant Gallen vnd das sú o^vch ledig loz vnd vnanspra^echig sint vnd sin sont fúr mich vnd fúr ma^enlichen, han ich die vorgenemten ho^ef gu^eter schůppůssen vnd zehenden ze ko^vffenn geben, als vorgeschriben stat, den vorgenemten Gerwig dem Blarrer vnd Johans Wildrich vmb zwai hundert pfunt vnd vmb fúnf vnd sibenzig pfunt pfenning alles gůter vnd ga^eber Costenzer múnse, der ich o^vch gantzlich vnd gar von in gewert bin vnd von in enphangen han vnd an minen offenn vnd gůten nutz bekêret an den stetten, da ich minen grôssen vnd wahsenden schaden mit verkomen han. Ich vergich o^vch, das ich den vorgenemten Gerwig dem Blarrer vnd Johans Wildrichen die vorgeschribenn ho^ef gu^eter schůppůssen vnd zehenden mit allen den vorgeschriben rehten, sie sient benemt ald vnbenemt, vnd also das ich zů den selben ho^euen vnd gu^etern schůppůssen vnd zehenden noch min erben noch ieman von minen wegen enhain reht fúrbass niemer nie haben sont noch gewinnen, geuertgot han vnd in ir hant brâht mit des êrwirdigen mines gna^edigen herren hant abt Hermans abt des gotzhus ze sant Gallen⁵, als reht sitte vnd gewonlich was vnd als es kraft hatt vnd haben sol nu vnd hienâch von reht vnd von gewonhait. Darúber han ich der vorgenemt Johans von Haidelberg ritter mich gantzlich entzigen vnd entzihe mich mit disem brieue fúr mich vnd fúr alle min erben vnd nâchkomen vnd fúr ma^enlichen von minen wegen aller ansprâch aller vordrung vnd alles rechten, so ich ald ieman von minen wegen zů den vorgeschribenen gu^etern ie gehatten ald iemer gehaben ald gewinnen mo^ehten von aigenschaft ald von lehens wegen ald von dehainer schlaht sach wegen. Ich vergich o^vch, daz ich gesworn han willeklich ainen gelerten ait zů den hailgen mit v^f gehabenr hant, daz ich vnd min erben der vorgenemten Gerwig des Blarrerz vnd Johans Wildrichs vnd ir erben reht wern súllen sin vnd sú darumbe verstân vnd versprechen sont nâch recht vmb die vorgeschriben ho^ef gu^eter schůppůssan vnd zehenden, als ich sú verko^vft han, als vorgeschriben stât, gen ma^enlichem an gaistlichem vnd an weltlichem gericht vnd wa sú sin notdurftig sint. Darúber so han ich den selben Gerwig dem Blarrer vnd Johans Wildrichen vnd iren erben zů mir vmb die vorgeschriben ho^eue gu^eter schůppůssen vnd zehenden ze wern vnd ze búrgen geben dis nâchgenemten êrsamen lút hern Cůnrat den Schenken vnd hern Bernhart den Schenken von Landegge⁶ baid ritter, Burkarten von Ainwille⁷, Johansen von Stainach, Cůnrat Phefferhart vnd V^olrich vnd Hainrich in der Búnde burger ze Costentz vnd Johansen Arnolt von sant Gallen, die mit der beschaidenhait die werschaft vnd die búrgschaft vff sich genomen vnd gelobt hant, als hie nâch geschriben stât. Wa^er daz, daz die vorgenemten Gerwig den Blarrer vnd Johans Wildrichen ald ir erben an den vorgenemten ho^euen gu^etern schůppůssen vnd zehenden an allen ald an dehainem besunderlich oder an dehainen rechten oder an dehainen dingen, so zů den selben vorgenemten ho^euen gu^etern schůppůssen vnd zehenden geho^erent, ieman drangdi oder sú darumb anspra^ech ald in dehainen weg můti, des sol ich vnd die selben wern vnd búrgen sú vnd ir erben v^s nemen vnd sú darumb entrichen versprechen vnd verstân nâch recht gen ma^enlichem an gaistlichem vnd an weltlichem gericht vnd wâ vnd wie dik sú sin notdurftig sint, vnd súllent daz tůn ân allen fúrzug vnd ân alle widerrede, wenn wir darumb ermant werdent von in ald von ir erben ald von ir gewissen botten ze hûs ze hof ald vnder o^vgen. Ta^etin ich vnd die vorgenemten wern vnd búrgen daz niht, so han ich der vorgenemt Johans von Haidelberg ritter vnd die vorgenemten wern alle willeklich gesworn gelêrt aid zů den hailgen mit v^fgehabnen handen, wenn wir von den vorgenemten Gerwig dem Blarrer vnd Johans Wildrich ald von ir erben oder von ir gewissen botten ermant werdent gemainlich oder dehaine besunder ze hus ze hof oder vnder o^vgen, daz wir v´ns dann ân allen fúrzug antwúrten sont inrent den na^ehsten aht tagen nâch der manung gen sant Gallen in die stat vnd niemer vss der selben stat ze komenn, ê daz die vorgenemten Gerwig vnd Johans Wildrich vnd ir erben des gebresten entladen vnd erledgot werdent, darumb sú v´ns dann ie ermant hânt von der vorgeschribenen gu^eter wegen. Die vorgenemten wern hânt in selber daz behalten, wele vnder in niht selb laisten mag oder niht selb laisten wo^elt, der sol ainen kneht mit ainem maiden an sin stat legen, der laist vngeuârlich in allem dem rehten, als er selber laisten sol. Aber das ist mir dem vorgenemten Johansen von Haidelberg niht behalten, won ich sol mit min selbes lip laisten, als vorgeschriben stât. Wa^er o^vch, das der vorgenemten wern vnd búrgen dehainer ab gieng von todes wegen oder von andren sachen vnnútz wûrde, so sol ich vnd min erben, ob ich enwa^er, den vorgenemten Gerwig dem Blarrer vnd Johans Wildrichen vnd iren erben ainen andern wern vnd búrgen an des stat geben, der abgangen ist, der als gůt vnd als gewiss sie, als der waz, der abgangen ist, ân alle geua^erde darnâch inrent dem na^ehsten mânot, so ich ald min erben darumb von in ermant werdent, als vorgeschriben stât. Won ta^et ich das niht ald min erben, ob ich enwa^er, so sol ich vnd o^vch die vorgenemten wern bi dem aid, als wir gesworn habent, laisten vnd v´ns antwúrten in die vorgenemten stat inrent dem zil, als vorgeschriben stat, wenn wir darumb ermant werdent von den vorgenemten Gerwig dem Blârrer vnd Johans Wildrich ald von ir erben oder von ir gewissen botten, vnd súllent da laisten, als vorbeschaiden ist, biz in der wer geben wirt. Ich der vorgenemt Johans von Haidelberg han o^vch gesworn fúr mich vnd fúr alle min erben ainen gelerten aid ze den hailgen, daz ich die vorgenemten wern vnd búrgen lo^esen vnd ledgen sol vnuerzogenlich von allem dem schaden, in den sú koment von der vorgeschriben werschaft gelúpt vnd búrgschaft wegen, vnd han in vnd ir helffern darumb erlo^vpt, min lút vnd min gůt ze pfendenn vnd ze no^etenn vnd an ze griffenn, wie ald wâ sú daz getůn mugent, mit geriht ald ân geriht, biz das sú da von gantzlich vnschadhaft werdent. V´ber dis alles so han ich mich entzigen vnd entzihe mich mit disem brieue fúr mich vnd alle min erben vnd nâchkomen alles schirmes alles rehten aller helf vnd aller gesetzt, die ietz sint ald hernâch werdent, von gaistlichem ald von weltlichem gericht, da mit der vorgeschriben ko^vff vnd dú vorgeschribenen ding vnd geding bekrenket mo^ehtint werden in dehainen weg von mir ald von ieman andre von minen wegen ald an miner stat. Vnd ze ainer sta^eten vnd gantzer sicherhait aller der vorgeschribenen dinge vnd gedinge so han ich der dikbenemt Johans von Haidelberg ritter min insigel gehenkt an disen brief fúr mich vnd alle min erben vnd nâchkomen. Wir die vorgenemten wern vnd búrgen Cůnrat vnd Bernhart die Schenken von Landegge baid ritter, Burkart von Ainwille, Johans von Stainach, Cůnrat Phefferhart, V^olrich vnd Hainrich in der Búnde vnd Johans Arndt veriehent offenlich an disem brieue, daz alles daz wâr ist, daz von v´ns an disem brief geschriben stât. Vnd des ze merer sicherhait so haben wir o^vch v´nserú insigel gehenkt an disen brief. Der geben wart ze sant Gallen, an dem na^ehsten zinstag nâch sant Valentis tag in dem jâr, do man zalt von gottes gebúrt drúzehenhundert jâr, fúnfzig jâr vnd darnâch in dem dritten jâr.

Source Fulltext: Chartularium Sangallense VII, Nr. 4285, S. 180-182.