Wir . . der schulthaisse . . der ra^vt vnd alle . . burger gemainlich rich vnd arme des riches statt ze Schafhusen¹ veriehen offenlich || vnd ainmu^eteklich fúr v´ns vnd fúr v´nser nahkomen mit disem brief, won v´ns des riches stette, die den lantfride || in Swa^vben haltent, vf sant Walpurg tag, als dirre brief geben ist, in den lantfride ze aitgenossen ze Vlme genomen || vnd enphangen hant² nah der abgeschrift sag, die wir darvmb haben vnd als vil des riches stette abgeschrift darvmb hant, erkennen wir v´ns an disem brief, das wir den selben lantfride also gemainlich vnd getrúlich ze den hailigen gelert aide gesworen haben mit vf gebottenen vingern sta^et ze haltenne vnd ze habenne, das wir getân haben vor der erberen stett botschaft der statt ze Rôtwil³, der statt ze sant Gallen vnd der statt ze V´berlingen⁴. Sunderbar hant des riches stette v´nser aitgenossen vsgenomen mit rehtem geding, das si v´ns dehaines alten krieges, e wir in dis buntnúst komen siien, es si von der herschaft von O^esterrich, von graf Albrehten von Werdenberg⁵, von Zúricher wegen oder von anderen allen kriegen vnd sto^essen, die v´ns angeuallen sint, e wir in dis buntnúst siien komen, nihtz ze manenne haben noch dar vmb vmb dehain hilf des riches stette v´nser aitgenossen zů sprechen noch manen mugen, denne als wir an iren trúwen vnd gnaden eruinden vnd bekomen mugen hilf vnd fúrdrung. Sunderbar haben wir o^vch gerette, das v´ns die stette nihtz gebunden sint ze helfenne gen der herschaft von O^esterrich noch gen den von Zúrich noch wir in hin wider. Vnd des alles ze ainem waren vrkúnde haben wir v´nser statt gemaines insigel ze Schafhusen gehenket an disen brief. Vnd dar v´ber haben wir die burger gemainlich ze Rotwil vnd wir . . die burger gemainlich ze sant Gallen vnd wir die burger gemainlich ze V´berlingen v´nser aller stette gemainú insigel ze ainer zúgnúst der vorgeschribener ding dur der von Schafhusen flissiger bette willen gehenket an disen brief. Der geben wart an dem vorgeschribenn sant Walpurg tag in dem ja^vre, do man zalt von Cristes gebúrte drúzehenhundert vnd fúnftzig jâr vnd darnah in dem dritten ja^vr.

Source Fulltext: Chartularium Sangallense VII, Nr. 4296, S. 189-190.