Wir graf Fridrich von Tokenburg¹ veriehen offenlich mit disem brief vmb die driie zehenden ze Betno^vw² || in der Mark³ gelegen, der einr geheissen ist der zehend in dem velde, der ander der frî zehend, der dritte der hofstat || zehend, die Jacob Marschalk burger Zúrich von v´ns ze lehen hatte, die selben zehenden er nu zeko^vffenn geben hat || den erwirdigen geistlichen . . dem abt vnd dem conuent gemeinlich des gotzhuss ze Rúti⁴ des ordens von Premonstrey. Sol man wissen, das o^vch wir durch got durch v´nserr vnd v´nserr vorderen vnd nachkomen selen heils willen die eigenschaft der selben zehenden mit allem recht, so dar zů geho^ert, ledigem vnd loss vfgeben haben dem vorgenanten conuent vnd dem gotzhus ze Rúti, also das si vnd ir gotzhus vnd ir nachkomen die selben zehenden mit allem recht, so dar zů ho^ert, fúrbass haben vnd niessen súln, besetzen vnd entsetzen, wie vnd weles weges si des notdúrftig sint, als ir eigenlich gůt vnbekúnbert vnd vngesûmt von v´ns vnd allen v´nseren nachkomen, won o^vch wir v´ns gar vnd gantzlich enzigen haben vnd entzichen mit disem brief fúr v´ns vnd v´nser nachkomen vnd fúr all v´nser erben der eigenschaft, der lehenschaft, der manschaft vnd mit namen alles rechten, so wir nû oder hie nah dekein wis iemer gewinnen mo^echten nach dien vorgeschribenn driien zehenden ze Betno^vw, mit allem recht, so dar zů geho^ert, gegen den obgenanten . . dem abt vnd dem conuent ze Rúti oder gen ir nachkomen ân all geuerde. Vnd des ze warem vnd offem vrkúnde diser gift vnd diser ding so henken wir der obgenant graf Fridrich von Tockenburg vnser eigen insigel offenlich an disen brief. Der ze Liehtensteig⁵ geben ist, do man zalte von gottz gebúrt drúzehenhundert jar vnd darnach in dem drúvndfúnftzgosten jare, an dem nechsten mentag nach des heilgen crútz tag ze meiyen.

Source Fulltext: Chartularium Sangallense VII, Nr. 4297, S. 190.