Wir Albrecht von gottes genaden hertzog ze O^esterreych ze Steyr vnd ze Kaerinden¹ tůn kunt, das wir v´nserm || getrúwen lieben Otten von Rambach vmb den dienst, den er v´ns getan hat vnd noch fu^erbaz tůn sol, gelten súln || zwaintzig march silbers, ie fúnf guldin fúr ein march ze reitenne, vnd haben wir im vnd sein erben fúr die || selben zwaintzig march gesetzzet vnd setzzen im o^vch v´nser ime² ze Rapprechtswile³ in v´nser stat mit allen rechten vnd nútzzen, so dar zů geho^ert vnd es von alter da her komen ist, vnd sol er vnd sein erben die selben ime innehaben vnd niessen als lang, vntz das wir vnd v´nser erben das lo^esend von im oder seinen erben vmb die egenanten zwentzig march silbers gentzlich verrichten vnd geben vor sant Johans tag ze súngichten, wenne es dar nach beschech, so ist o^vch Otten von Rambach vnd seinen erben der zins des jares geuallen. Mit vrkúnd dis briefes, geben an dem mentag vor Bartholomei nach Cristes gebúrt drútzechen hundert jar, dar nach in dem vier vnd fúnftzigosten jare.

Source Fulltext: Chartularium Sangallense VII, Nr. 4368, S. 242.